സിനിമയിലെ സംഘട്ടന രംഗങ്ങൾ പലപ്പോഴും അപകടം പിടിച്ചതാണ്. പരിക്കുകൾ നിത്യസംഭവങ്ങളുമാണ്. എന്നാൽ ഒരു ചിത്രത്തിന്റെ ഷൂട്ടിനിടെ നടൻ മോഹൻലാൽ ആനയുടെ ആക്രമണത്തിൽ നിന്നും കഷ്ടിച്ച് രക്ഷപ്പെടുകയായിരുന്നു. നടൻ ബാബു നമ്പൂതിരിയാണ് വർഷങ്ങൾക്ക് മുമ്പ് നടന്ന ആ സംഭവം വെളിപ്പെടുത്തിയത്. ഒരു ചാനലിന് നൽകിയ അഭിമുഖത്തിലായിരുന്നു ബാബു നമ്പൂതിരിയുടെ വെളിപ്പെടുത്തൽ.
1986ൽ പുറത്തിറങ്ങിയ അടിവേരുകൾ എന്ന ചിത്രത്തിനിടെയായിരുന്നു സംഭവം. 'ഐ.വി ശശിയുടെ അസോസിയേറ്റ് ആയിരുന്ന അനിലാണ് ചിത്രത്തിന്റെ സംവിധായകൻ. തെന്മലയായിരുന്നു ഷൂട്ടിംഗ്. കാട്ടിൽ മോഹൻലാൽ ഒരു കയറിൽ ആടുകയാണ്. ഒരറ്റത്തുനിന്നും മരത്തിൽ കെട്ടിയിരിക്കുന്ന കയറിൽ തൂങ്ങി ആനയുടെ മുമ്പിൽ കൂടി മറ്റേ അറ്റത്തേക്ക് മോഹൻലാൽ ചാടണം. അതാണ് ഷോട്ട്.
മോഹൻലാൽ ചാടി എത്തുന്ന സ്ഥലത്താണ് ക്യാമറ വച്ചിരിക്കുന്നത്. ആനയുടെ കൊമ്പ്, തുമ്പിക്കൈ എന്നിവയാണ് ക്യാമറയിൽ കാണുക. ആക്ഷൻ പറഞ്ഞതും ലാൽ തൂങ്ങി വന്നു. മുമ്പിലെത്തിയതും തുമ്പിക്കൈ കൊണ്ട് ആന ഒറ്റയടി. ദൈവകൃപ കൊണ്ട് ആ അടി ലാലിന്റെ ദേഹത്ത് കൊണ്ടില്ല. കൊണ്ടിരുന്നെങ്കിൽ ഒരു ഫുട്ബോൾ പന്തു പോലെ ലാൽ തെറിച്ചു പോയേനെ എന്ന് ബാബു നമ്പൂതിരി പറഞ്ഞു.
സംഭവത്തിൽ സെറ്റാകെ ഞെട്ടിത്തരിച്ചുപോയി. തൃശൂരുള്ള ഒരു ആനയെയായിരുന്നു അഭിനയിക്കാനായി കൊണ്ടുവന്നിരുന്നത്. അതിന് മദത്തിന്റെ ലക്ഷണമുണ്ടായിരുന്നു എന്നും ബാബു നമ്പൂതിരി പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
