ന്യൂഡല്‍ഹി; ഗോവയില്‍ നടക്കാനിരിക്കുന്ന 50ാം അന്താരാഷ്ട്ര ചലച്ചിത്രോത്സവത്തിലെ സ്‌പെഷ്യല്‍ ഐക്കണ്‍ ഓഫ് ഗോള്‍ഡന്‍ ജൂബിലി അവാര്‍ഡ് തെന്നിന്ത്യന്‍ സൂപ്പര്‍താരം രജനീകാന്തിന്. കേന്ദ്രമന്ത്രി പ്രകാശ് ജാവദേക്കറാണ ്പുരസ്‌കാരം പ്രഖ്യാപിച്ചത്. ഫ്രഞ്ച് താരം ഇസബെല്ലെ ഹൂപ്പര്‍ക്കാണ് ലൈഫ്‌ടൈം അച്ചീവ്‌മെന്റ് അവാര്‍ഡ്.
ഈ മാസം 20 മുതല്‍ 28 വരെ നടക്കുന്ന ചലച്ചിത്രോത്സവത്തിന്റെ ഉദ്ഘാടന ചടങ്ങില്‍ പുരസ്‌കാരങ്ങള്‍ സമ്മാനിക്കും. വിവിധ രാജ്യങ്ങളില്‍ നിന്നുള്ള 250 ചിത്രങ്ങളാണ് മേളയില്‍ പ്രദര്‍ശിപ്പിക്കുന്നത്. ചലച്ചിത്രമേള സുവര്‍ണ ജൂബിലി ആഘോഷിക്കുന്ന വേളയില്‍ സിനിമയിലെ സ്ത്രീകളുടെ പങ്കിന് ആദരവ് അര്‍പ്പിച്ചുകൊണ്ട് 50 വനിത സംവിധായകരുടെ ചിത്രങ്ങളും പ്രദര്‍ശിപ്പിക്കും.
ദാദാ സാഹെബ് ഫാല്‍ക്കെ അവാര്‍ഡ് നേടിയ അമിതാഭ് ബച്ചന്റെ സിനിമകളും ചലച്ചിത്ര മേളയില്‍ പ്രദര്‍ശിപ്പിക്കും. ഫെസ്റ്റിവല്‍ വേദി ഗോവയില്‍ നിന്ന് മാറ്റില്ലെന്ന് മന്ത്രി അറിയിച്ചു. ചലച്ചിത്ര മേളക്ക് ഫിലിം വില്ലേജ് പണിയുന്ന തീരുമാനത്തില്‍ വൈകാതെ തീരുമാനമുണ്ടാകുമെന്നും അദ്ദേഹം പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
