ബോളിവുഡിലെ സൂപ്പര്‍താരം ഷാരുഖ് ഖാന്റെ പിറന്നാള്‍ ആവേശത്തോടെയാണ് ബോളിവുഡ് ലോകം ആഘോഷിച്ചത്. ആരാധകരും സഹതാരങ്ങളുമെല്ലാം താരത്തിന് പിറന്നാള്‍ ആശംസകള്‍ നേര്‍ന്നു. ഇന്ത്യയില്‍ മാത്രമല്ല വിദേശത്തു നിന്നും ഷാരുഖിന് ആശംസ പ്രവാഹമായിരുന്നു. ലോകത്തെ ഏറ്റവും ഉയരംകൂടിയ ബുര്‍ജ് ഖലീഫയിലും ഷാരുഖായിരുന്നു താരം. ഹാപ്പി ബര്‍ത്ത്‌ഡേ ഷാരുഖ് ഖാന്‍ എന്ന കുറിപ്പാണ് ബുര്‍ജ് ഖലീഫയില്‍ തിളങ്ങി നിന്നത്. ഇത് കാണാന്‍ നിരവധി ആരാധകരും എത്തിയിരുന്നു.
ആശംസയ്ക്ക് നന്ദി അറിയിച്ച് ഷാരുഖും രംഗത്തെത്തി. ബുര്‍ജ് ഖലീഫയുടെ വിഡിയോ പങ്കുവെച്ചാണ് താരം നന്ദി അറിയിച്ചത്. തന്റെ തിളക്കം കൂട്ടിയതിന് നന്ദി എന്നാണ് താരം കുറിച്ചത്. എന്തായാലും ആരാധകരെ ആവേശത്തിലാക്കിയിരിക്കുകയാണ് ബുര്‍ജ് ഖലീഫ ഷാരൂഖിന് നല്‍കിയ ബര്‍ത്ത്‌ഡേ ട്രീറ്റ്. ഇന്ത്യക്കാര്‍ക്ക് അഭിമാന നിമിഷമായിരുന്നു എന്നാണ് ആരാധകര്‍ പറയുന്നത്.
ഷാരുഖിന്റെ 54ാം ജന്മദിനത്തില്‍ ആശംസയുമായി ആദ്യം എത്തിയത് ആരാധകരാണ്. അര്‍ധരാത്രി 12 മണി തികയുന്നതിന് മുന്‍പ് തന്നെ ആരാധകര്‍ മന്നത്തിനു മുന്നിലേക്ക് എത്തി തുടങ്ങിയിരുന്നു. ഒട്ടും വൈകാതെ വീടിന്റെ ബാല്‍ക്കണിയില്‍ കിങ് ഖാന്‍ എത്തി. ആരാധകര്‍ പിറന്നാള്‍ ആശംസകള്‍ നേര്‍ന്നു. തിരിച്ച് താരം തന്റെ ആരാധകര്‍ക്കെല്ലാം ഫ്‌ലൈയിങ് കിസും എറിഞ്ഞ് കൊടുത്തു. കനത്ത സുരക്ഷയായിരുന്നു അദ്ദേഹത്തിന് ഏര്‍പ്പെടുത്തിയിരുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
