മെഗാസ്റ്റാർ മമ്മൂട്ടി നായകനാകുന്ന ബ്രഹ്മാണ്ഡ ചിത്രം മാമാങ്കം ഡിസംബർ 12ന് റിലീസ് ചെയ്യും. കേരളത്തിൽ 400 തിയേറ്ററുകളിലാണ് ചിത്രം പ്രദർശനത്തിനെത്തുക. തിരുവനന്തപുരത്ത് ന്യൂ കോംപ്ലക്സിലെ മൂന്ന് സ്ക്രീനുകളിലും കൈരളി കോംപ്ലക്സിലും ശ്രീപദ്മനാഭ കോംപ്ലക്സിലും കൃപ കോംപ്ലക്സിലും ചിത്രം റിലീസ് ചെയ്യും. മൾട്ടിപ്ലക്സുകളിലെല്ലാം ഒന്നിലേറെ സ്ക്രീനുകളിൽ മാമാങ്കം റിലീസ് ചെയ്യാനാണ് അണിയറപ്രവർത്തകരുടെ തീരുമാനം.
കാവ്യാ ഫിലിംസിന്റെ ബാനറിൽ വേണു കുന്നപ്പിള്ളി നിർമ്മിച്ച് എം. പത്മകുമാർ സംവിധാനം ചെയ്യുന്ന മാമാങ്കം മലയാളത്തിന് പുറമേ തമിഴ്, തെലുങ്ക്, ഹിന്ദി ഭാഷകളിലും ഒരേ സമയം റിലീസ് ചെയ്യും. എല്ലാ ഭാഷകളിലും മമ്മൂട്ടി തന്നെയാണ് ഡബ് ചെയ്തിരിക്കുന്നത്. ഡബ്ബിംഗ് പതിപ്പുകൾ ഉൾപ്പെടെ ലോകമെമ്പാടും ഏറ്റവുമധികം സ്ക്രീനുകളിൽ ഒരേസമയം റിലീസ് ചെയ്യുന്ന മലയാള ചിത്രമെന്ന ഖ്യാതി ഇതോടെ മാമാങ്കത്തിന് കൈവരികയാണ്.
തിരുവനന്തപുരത്ത് ഏരീസ് പ്ളക്സിൽ ചിത്രത്തിന്റെ തമിഴ്, തെലുങ്ക് പതിപ്പുകളും റിലീസ് ചെയ്യും. ഉണ്ണിമുകുന്ദൻ, സിദ്ദിഖ്, സുദേവ് നായർ, അച്യുതൻ, മണിക്കുട്ടൻ, തരുൺ രാജ് വോറ, പ്രാചി ടെഹ്ലാൻ, കനിഹ, അനു സിതാര, ഇനിയ തുടങ്ങിയവ വമ്പൻ താരനിരയാണ് മാമാങ്കത്തിൽ അമിനിരക്കുന്നത്. മനോജ് പിള്ളയാണ് ചിത്രത്തിന്റെ ഛായാഗ്രഹണം. സംഗീതം നിർവഹിച്ചിരിക്കുന്നത് എം ജയചന്ദ്രനാണ്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ