സുരേഷ് ഗോപിയെ നായകനാക്കി നിധിന്‍ രണ്‍ജി പണിക്കര്‍ സംവിധാനം ചെയ്യുന്ന ചിത്രത്തിന്റെ പേര് പ്രഖ്യാപിച്ചു. 'കാവല്‍' എന്നാണ് ചിത്രത്തിന്റെ പേര്. മടക്കിക്കുത്തിയ മുണ്ടില്‍ തോക്ക് തിരുകിയ ചിത്രമാണ് അനൗണ്‍സ്‌മെന്റ് പോസ്റ്ററായി പുറത്തുവിട്ടിട്ടുള്ളത്.
'സത്യം തെളിയുന്നത് വരെ, കുടുംബത്തിനും നിങ്ങള്‍ക്കും കാവലായി ഞാനും, എനിക്ക് കാവലായി ദൈവവുമുണ്ട്', എന്നാണ് പോസ്റ്ററിനൊപ്പം സുരേഷ് ഗോപി ഫേസ്ബുക്കില്‍ കുറിച്ചത്. ഗുഡ്‌വില്‍ എന്റര്‍ടെയ്ന്‍മെന്റ്‌സിന്റെ ബാനറില്‍ ജോബി ജോര്‍ജ് ആണ് നിര്‍മ്മാണം.
മടങ്ങിവരവിൽ സുരേഷ് ഗോപിയെ നായകനാക്കി പ്രഖ്യാപിക്കുന്ന രണ്ടാമത്തെ ചിത്രമാണിത്. രണ്‍ജി പണിക്കർ തിരക്കഥയെഴിതിയ സുരേഷ് ഗോപിയുടെ സൂപ്പർഹിറ്റ് ചിത്രം ലേലത്തിന്റെ രണ്ടാംഭാഗം നിധിന്‍ സംവിധാനം ചെയ്യുന്നെന്ന് ആദ്യം റിപ്പോർട്ടുകളുണ്ടായിരുന്നു. എന്നാൽ രണ്ട് തലമുറകളുടെ കഥ പറയുന്ന ആക്ഷന്‍ ഫാമിലി ചിത്രമാണ് 'കാവല്‍' എന്നാണ് നിധിൻ പറയുന്നത്.
സുരേഷ് ഗോപിക്കൊപ്പം ലാലും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കും. സയ ഡേവിഡ്, മുത്തുമണി, ഐ എം വിജയന്‍, സുജിത്ത് ശങ്കര്‍, അലന്‍സിയര്‍, കണ്ണന്‍ രാജന്‍ പി ദേവ് തുടങ്ങിയവരാണ് മറ്റ് അഭിനേതാക്കള്‍.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
