മീ ടൂ ആരോപണവിധേയനായ സംവിധായകന് സുഭാഷ് കപൂറിനൊപ്പം സിനിമ ചെയ്യാനൊരുങ്ങുന്ന ആമിര് ഖാനെ വിമര്ശിച്ച് നടി തനുശ്രീ ദത്ത. സംഗീതജ്ഞന് ഗുല്ഷന് കുമാറിന്റെ ജീവിതത്തെ ആസ്പദമാക്കി ഒരുങ്ങുന്ന മോഗുല് എന്ന ചിത്രം സംവിധാനം ചെയ്യുന്നത് സുഭാഷ് ആണ്. ആമിര് ആണ് ഗുല്ഷന് കുമാര് ആയി എത്തുന്നത്.
2014ലാണ് നടി ഗീതിക ത്യാഗി സുഭാഷിനെതിരെ ലൈംഗികാരോപണം ഉന്നയിച്ചത്. പിന്നാലെ സുഭാഷിനൊപ്പം സഹകരിക്കില്ലെന്ന് ആമിര് വ്യക്തമാക്കിയിരുന്നു. മോഗുലില് നിന്ന് സുഭാഷിനെ ഒഴിവാക്കുകയും ചെയ്തിരുന്നു. എന്നാല് ഈയടുത്താണ് ആമിര് നിലപാട് മാറ്റിയത്. ബോളിവുഡിനെയാകെ അമ്പരപ്പിച്ചാണ് സുഭാഷിനൊപ്പം സിനിമ ചെയ്യുന്നുവെന്ന് ആമിര് പറഞ്ഞത്.
''പീഡനത്തിനിരയായ, ഇപ്പോഴും മാനസികാഘാതത്തില് തുടരുന്ന സഹപ്രവര്ത്തകരായ നടിമാരെ ഓര്ത്ത് ബോളിവുഡില് ആര്ക്കും ഉറക്കം നഷ്ടപ്പെടാത്തത് എന്തുകൊണ്ടാണ്? അവര്ക്ക് അവസരം നഷ്ടപ്പെടുന്നത് ഓര്ത്ത് അസ്വസ്ഥരാകാത്തത് എന്തുകൊണ്ടാണ്? തൊഴിലിടത്തിലെ പീഡനം മൂലം കഴിവുള്ള താരങ്ങളുടെ ഇപ്പോഴത്തെ ജീവിതം എങ്ങനെയാകുമെന്ന് ആരും ചിന്തിക്കാത്തത് എന്താണ്'' തനുശ്രീ ചോദിക്കുന്നു.
നാനാ പടേക്കറിനെതിരെ ആരോപണമുയര്ത്തി ബോളിവുഡില് 'മീ ടൂ' വെളിപ്പെടുത്തലുകള്ക്ക് തുടക്കമിട്ടവരില് ഒരാളാണ് തനുശ്രീ. പിന്നാലെ നിരവധി താരങ്ങള് വെളിപ്പെടുത്തലുകളുമായി രംഗത്തുവന്നിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ