ലോക്ക്ഡൗൺ കാലത്ത് പുതിയ കവർ വിഡിയോയുമായി നടി രമ്യ നമ്പീശൻ. തമിഴ് ചിത്രം വാരണം ആയിരത്തിലെ 'അനൽ മേലേ പനിതുളി' എന്ന ഗാനമാണ് മാറ്റങ്ങളോടെ താരം അവതരിപ്പിച്ചിരിക്കുന്നത്. സ്വന്തം വീട്ടിൽ തന്നെ ചിത്രീകരിച്ച വിഡിയോയുടെ കാമറ കൈകാര്യം ചെയ്തിരിക്കുന്നത് രമ്യയുടെ സഹോദരൻ രാഹുലാണ്. രമ്യ അടുത്തിടെ തുടങ്ങിയ യൂട്യൂബ് ചാനലിലൂടെ വിഡിയോ പുറത്തുവിട്ടു.
"അസ്വസ്ഥതയുടെ ഈ നാളിൽ ചില പാട്ടുകൾ നമ്മിൽ ഒരായിരം വികാരങ്ങൾ ഉണർത്തും. സ്നേഹവും പ്രതീക്ഷയും സന്തോഷവും സംതൃപ്തിയും ഒക്കെ തരുന്ന പാട്ടുകൾ. വാരണം ആയിരത്തിലെ 'അനൽ മേലേ പനിതുളി' എന്ന ഗാനം അത്തരത്തിൽ ഒരെണ്ണമാണ്", വിഡിയോയ്ക്കൊപ്പം രമ്യ കുറിച്ചു.
സംഗീതസംവിധായകൻ ഹാരിസ് ജയരാജന്റെ ഗാനങ്ങളിൽ തനിക്കേറ്റവും പ്രിയപ്പെട്ട ഗാനമാണ് ഇതെന്ന് രമ്യ കുറിച്ചു. സുധാ രഘുനാഥന്റെ ആലാപനം മുതൽ താമരൈയുടെ വരികൾ വരെ ഈ പാട്ടിലെ എല്ലാം തനിക്കിഷ്ടമാണെന്നാണ് രമ്യ പറയുന്നത്. ഈ ഇഷ്ടങ്ങളാണ് ഇത്തരത്തിലൊരു കവർ ഒരുക്കാൻ താരത്തെ പ്രേരിപ്പിച്ചതും.
ഈ ക്വാറന്റൈൻ കലാരൂപത്തിന്റെ ചിത്രീകരണം മുതൽ റെക്കോർഡ്ഡിങ് വരെ തന്റെ വീട്ടിലാണ് നടന്നതെന്ന് രമ്യ അറിയിച്ചു. സമയം കടന്നുപോകുമെങ്കിലും ഈ കവർ തന്നെ എന്നും കൊറോണ കാലത്തെക്കുറിച്ച് ഓർമ്മിപ്പിക്കുമെന്നും താരം കുറിച്ചു. ഇത്തരം സന്ദർഭങ്ങളെ മറികടക്കാൻ കലയും സംഗീതവുമൊക്കെയാണ് പ്രേരണയാകുന്നതെന്ന് താരം പറയുന്നു.ഡോക്ടര്മാര് മുതല് ശുചീകരണതൊഴിലാളികളും പാരാമെഡിക്ക് ജീവനക്കാരും പൊലീസുകാരും ഉള്പ്പെടെയുള്ള ഹീറോകള്ക്കുള്ള സമര്പ്പണമാണ് ഈ കവറെന്നും രമ്യ കുറിച്ചു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ