കുറഞ്ഞ കാലത്തിനിടയിൽ മലയാളികൾക്ക് ഒരുപിടി മികച്ച കഥാപാത്രങ്ങൾ സമ്മാനിച്ചാണ് നടൻ അനിൽ നെടുമങ്ങാട് വിടപറയുന്നത്. സിനിമ മേഖലയിലുള്ള നിരവധി പേരുമായി മികച്ച സൗഹൃദവും അദ്ദേഹം സൂക്ഷിക്കുന്നുണ്ട്. അദ്ദേഹവുമായുള്ള ഓർമകൾ നിരവധി പേരാണ് പങ്കുവെച്ചുത്. ഇപ്പോൾ ആരാധകരെ അമ്പരപ്പിക്കുന്നത് നടി കനി കുസൃതിയുടെ പോസ്റ്റാണ്.
അനിലുമായുള്ള മെസേജിന്റെ സ്ക്രീൻഷോട്ടാണ് പങ്കുവെച്ചിരിക്കുന്നത്. അനിലേട്ടൻ മരിക്കുന്നതായി താൻ സ്വപ്നം കണ്ടുവെന്ന് മെസേജിലൂടെ അറിയിക്കുകയാണ് കനി. ചേട്ടന് ഓകെ അല്ലെ ഞാൻ ഇന്നലെ സ്വപ്നം കണ്ട് എന്നാണ് കനി പറയുന്നത്. മരിച്ചെന്നാണോ സ്വപ്നം കണ്ടത് എന്നായിരുന്നു അനിലിന്റെ ചോദ്യം. അതിനൊപ്പം താൻ ഓകെയാണെന്നും വ്യക്തമാക്കുന്നുണ്ട്. മരിച്ചെന്ന് കണ്ടെന്നും കരഞ്ഞു എഴുന്നേറ്റെന്നുമാണ് കനി മറുപടിയായി കുറിക്കുന്നത്.
2018 ഫെബ്രുവരി 13നാണ് ഇരുവരും നടത്തിയ സംഭാഷണമാണ് ഇത്. അനിൽ തന്നെയാണ് ഇതിന്റെ സ്ക്രീൻ ഷോട്ട് സോഷ്യൽ മീഡിയയിൽ പങ്കുവെച്ചത്. "മരണമെത്തുന്ന നേരത്തെങ്കിലും അരികത്ത് വരുമോ പൊന്നേ... പേടിക്കണ്ട നീ വന്നിട്ടേ ചാകു" എന്ന അടിക്കുറിപ്പിലാണ് അനിൽ ഇത് പോസ്റ്റ് ചെയ്തിരിക്കുന്നത്. മരണവാർത്ത വന്നതിന് പിന്നാലെ കനിയും ചാറ്റിന്റെ സ്ക്രീൻഷോട്ട് പങ്കുവെച്ചിട്ടുണ്ട്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ