മുഖ്യമന്ത്രി പിണറായി വിജയനൊപ്പമുള്ള കാല്‍ സെല്‍ഫിയിലൂടെയാണ് പ്രണവ് എന്ന കലാകാരന്‍ വാര്‍ത്തകളില്‍ നിറയുന്നത്. ഇരു കൈകള്‍ ഇല്ലെങ്കിലും കാലുകള്‍ കൊണ്ട് ചിത്രം വരക്കുകയും എഴുതുകയും ചെയ്യുന്ന പ്രണവ് അതിജീവനത്തിന്റെ മുഖമായി. ഇപ്പോള്‍ പ്രണവിനെ കാണാന്‍ മലയാളത്തിന്റെ സൂപ്പര്‍താരം മോഹന്‍ലാല്‍ എത്തിയിരിക്കുകയാണ്. വാര്‍ത്തകളിലൂടെ പ്രണവിനെക്കുറിച്ച് അറിഞ്ഞാണ് തന്റെ ആരാധകനെ കാണാന്‍ താരം എത്തിയത്.
തന്റെ ഇഷ്ടതാരത്തിന് ഒരു സമ്മാനം നല്‍കാനും പ്രണവ് മറന്നില്ല. മോഹന്‍ലാലിനെ കാണുമ്പോള്‍ സമ്മാനിക്കാനിക്കാനായി പ്രണവ് ഒടിയന്‍ മാണിക്യന്റെ ചിത്രം വരച്ചു സൂക്ഷിച്ചിരുന്നു. വരച്ച് ഫ്രെയിം ചെയ്ത ചിത്രം പ്രണവ് സൂപ്പര്‍താരത്തിന് സമ്മാനിച്ചു. മോഹന്‍ലാലിനൊപ്പം സ്‌പെഷ്യല്‍ സെല്‍ഫിയുമെടുക്കാനും പ്രണവ് മറന്നില്ല. പ്രണവിനോട് വിശേഷങ്ങള്‍ ചോദിച്ചും തമാശ പങ്കിട്ടും സമയം ചിലവഴിച്ചാണ് മോഹന്‍ലാല്‍ മടങ്ങിയത്.
ദുരിതാശ്വാസ നിധിയിലേക്ക് സംഭാവന നല്‍കാനാണ് പ്രണവ് മുഖ്യമന്ത്രിയെ കാണാന്‍ എത്തിയത്. ടെലിവിഷന്‍ റിയാലിറ്റി ഷോകളിലൂടെ നേടിയ തുകയാണ് നേരിട്ടെത്തി മുഖ്യമന്ത്രിക്ക് കൈമാറിയത്. തുടര്‍ന്ന് പ്രണവിനെക്കുറിച്ച് മുഖ്യമന്ത്രി ഫേയ്‌സ്ബുക്കില്‍ കുറിപ്പിട്ടിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
