മമ്മൂട്ടി നായകനായി എത്തിയ ഷൈലോക്ക് വിജയകരമായി മുന്നേറിക്കൊണ്ടിരിക്കുകയാണ്. അജയ് വാസുദേവാണ് ചിത്രം സംവിധാനം ചെയ്തത്. ഇപ്പോള്‍ ചിത്രത്തിന്റെ മേക്കിങ് വീഡിയോ പുറത്തുവിട്ടിരിക്കുകയാണ്. സെറ്റിലെ രസകരമായ കാഴ്ചകളും സ്റ്റണ്ട് സീനുകളുമെല്ലാം ഉള്‍പ്പെടുത്തിക്കൊണ്ടാണ് മേക്കിങ് വിഡിയോ.
സംവിധായകന്‍ അജയ് വാസുദേവ് അഭിനയിച്ച രംഗവും വിഡിയോയില്‍ ഉള്‍പ്പെടുത്തിയിട്ടുണ്ട്. മമ്മൂട്ടിയുടെ ചവിട്ടുകിട്ടി തെറിച്ചുവീഴുന്ന അജയിനെയാണ് കാണുന്നത്. സംവിധായകന്റെ പതനം കയ്യടികളോടെയാണ് ഷൂട്ടിങ് കാണാനെത്തിയവര്‍ സ്വീകരിച്ചത്. ചിത്രത്തില്‍ വില്ലന്‍ വേഷത്തിലാണ് അജയ് വാസുദേവ് അഭിനയിച്ചിരിക്കുന്നത്.
അജയ് വാസുദേവ് ഒന്നിച്ചുള്ള മമ്മൂട്ടിയുടെ മൂന്നാമത്തെ ചിത്രമാണ് ഷൈലോക്ക്. രാജാധിരാജ, മാസ്റ്റര്‍ പീസ് എന്നിവയാണ് മറ്റു ചിത്രങ്ങള്‍. തമിഴ് നടന്‍ രാജ് കിരണിന്റെ ആദ്യ മലയാളം ചിത്രമാണ് ഷൈലോക്ക്. മീന, സിദ്ദിഖ്, കലാഭവന്‍ ഷാജോണ്‍, ഹരീഷ് കണാരന്‍, ബൈജു എന്നിവരും പ്രധാന വേഷത്തില്‍ എത്തിയിരുന്നു. ബിബിന്‍ മോഹനും അനീഷും ചേര്‍ന്നാണ് ചിത്രത്തിന് തിരക്കഥയൊരുക്കുന്നത്. ഗുഡ് വില്‍ എന്റര്‍ടെയ്ന്‍മെന്റിന്റെ ബാനറില്‍ ജോബി ജോര്‍ജാണ് ചിത്രം നിര്‍മിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
