പുതിയ ചിത്രം സുരറൈ പോട്രിന്റെ സോങ് റിലീസ് വ്യത്യസ്തമാക്കാന് തമിഴ് സൂപ്പര്താരം സൂര്യ. ഇതുവരെ വിമാനത്തില് യാത്ര ചെയ്യാത്ത 100 കുട്ടികള്ക്കൊപ്പം പറന്നാണ് പുതിയ ചിത്രം സുരറൈ പോട്രിലെ പാട്ട് സൂര്യ പുറത്തിറക്കുന്നത്. ഇന്ന് സ്പൈസ് ജെറ്റ് ബോയിങ് 737 എയര് ക്രാഫ്റ്റില് വെച്ചാണ് ചടങ്ങുകള് നടക്കുക. 45 മിനിറ്റ് യാത്രയ്ക്കിടെയായിരിക്കും പാട്ട് പുറത്തിറക്കുക. സ്പൈസ് ജെറ്റ് ഉടമ അജയ് സിങ്ങുമായി ചേര്ന്നാണ് പാട്ടു പുറത്തിറക്കുക
തമിഴ്നാട്ടിലെ സര്ക്കാര് സ്കൂളുകളില് സിനിമയുടെ അണിയറ പ്രവര്ത്തകര് ഉപന്യാസ മത്സരം നടത്തിയിരുന്നു. അതിലെ വിജയികള്ക്കാണ് വിമാന യാത്രയ്ക്ക് അവസരം ലഭിക്കുന്നത്. ഇവരെ സാക്ഷിയാക്കിയാണ് പരിപാടികള് നടക്കുക. സൂര്യയുടെ മൂപ്പത്തിയെട്ടാമത്തെ ചിത്രമാണിത്. മലയാളി താരം അപര്ണ മുരളിയാണ് നായിക. നേരത്തെ ചിത്രത്തിന്റെ ഫസ്റ്റ് ലുക്ക് പോസ്റ്റര് സോഷ്യല് മീഡിയയില് വൈറലായിരുന്നു.
2ഡി എന്റര്ടൈന്മെന്റ്സും സീഖ്യാ എന്റര്ടെയ്ന്മെന്റിന്റെ ബാനറില് ഗുനീത് മോംഘയും ചേര്ന്നാണ് ചിത്രം നിര്മ്മിക്കുന്നത്. സുധ കൊങ്ങര സംവിധാനം ചെയ്യുന്ന ചിത്രം ഫെബ്രുവരി 21 നാണ് റിലീസ് ചെയ്യുന്നത്. എയര് ഡെക്കാന് സ്ഥാപകന് ക്യാപ്റ്റന് ജി ആര് ഗോപിനാഥിന്റെ ജീവിത കഥയെ അടിസ്ഥാനമാക്കിയാണ് ചിത്രം നിര്മിച്ചിരിക്കുന്നത്. മോഹന് റാവു, പരേഷ് റാവല്, ജാക്കി ഷ്രോഫ് എന്നിവരാണ് ചിത്രത്തിലെ മറ്റ് താരങ്ങള്. ജി.വി പ്രകാശാണ് സംഗീതം ഒരുക്കുന്നത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ