പൃഥ്വിരാജിന്റെ കരിയറിലെ തന്നെ ഏറ്റവും ശക്തമായ സിനിമയാണ് ആടുജീവിതം. ഇതുവരെ ഒരു ചിത്രത്തിനും എടുക്കാത്ത പ്രയത്‌നമാണ് നജീബിനുവേണ്ടി താരം എടുക്കുന്നത്. മൂന്ന് മാസം സിനിമയില്‍ നിന്ന് അവധിയെടുത്താണ് താരം തയാറെടുപ്പുകള്‍ നടത്തുന്നത്. എന്നാല്‍ പൃഥ്വിയുടെ ഇപ്പോഴത്തെ മേക്കോവര്‍ ആരാധകരെ ആശങ്കയിലാക്കിയിരിക്കുകയാണ്. മെലിഞ്ഞുണങ്ങിയ അവസ്ഥയിലാണ് താരമിപ്പോള്‍.
അവസാനം ഇറങ്ങിയ താരത്തിന്റെ ചിത്രം അയ്യപ്പനും കോശിയിലെ കഥാപാത്രം കോശിയുടെ പകുതി വണ്ണം പോലും ഇപ്പോള്‍ ഇല്ലല്ലോ എന്നാണ് ആരാധകര്‍ പറയുന്നത്. മെലിഞ്ഞതിനൊപ്പം താരം താടിയും മുടിയും നീട്ടിവളര്‍ത്തുന്നുമുണ്ട്. താരത്തിന്റെ പുതിയ വിഡിയോ സോഷ്യല്‍ മീഡിയയില്‍ വൈറലാവുകയാണ്. തീരെ മെലിഞ്ഞ അവസ്ഥയിലാണ് താരമിപ്പോള്‍. ഇത്രയും ഡെഡിക്കേഷന്‍ വേണോ എന്നാണ് ആരാധകര്‍ ആശങ്കയോടെ ചോദിക്കുന്നത്.
ഇതിനോടകം 30 കിലോയോളം ഭാരമാണ് പൃഥ്വി കുറച്ചത്. എന്നാല്‍ താന്‍ മെലിയുന്നത് കണ്ട് ആരും അനുകരിക്കരുതെന്നും ഇത് അപകടകരമാണെന്നുമാണ് പൃഥ്വിരാജ് പറയുന്നത്. കൃത്യമായ വൈദ്യ നിരീക്ഷണം ഉള്ളതിനാലാണ് അധികം അപകടമൊന്നുമില്ലാതെ നിലനില്‍ക്കുന്നതെന്നാണ് അടുത്തിടെ ഒരു ദേശിയ മാധ്യമത്തിന് നല്‍കിയ അഭിമുഖത്തില്‍ താരം പറഞ്ഞത്. സാധാരണ സിനിമയ്ക്കു വേണ്ടി മസില്‍ വെക്കുകയും തടി കുറയ്ക്കുകയുമൊക്കെ ചെയ്യുന്നത് ആസ്വദിക്കാറുണ്ട്. എന്നാല്‍ ആടുജീവിതത്തിനേ വേണ്ടിയുള്ള മേക്കോവര്‍ തമാശയല്ലെന്നാണ് താരം വ്യക്തമാക്കുന്നത്. ബന്യാമിന്റെ പ്രശസ്തമായ നോവല്‍ ബ്ലസിയാണ് സിനിമയാക്കുന്നത്. അമല പോളാണ് നായിക.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
