മറാത്ത സമുദായത്തെ അപമാനിച്ചുവെന്ന് ആരോപിച്ച് നടന്‍ അക്ഷയ് കുമാറിനെതിരെ കേസെടുക്കാന്‍ ആവശ്യം. മറാത്ത സംഘടനയാണ് താരത്തിനെതിരേ പൊലീസിനെ സമീപിച്ചത്. അക്ഷയ് കുമാര്‍ അഭിനയിച്ച നിര്‍മ വാഷിങ് പൗഡര്‍ പരസ്യം വലിയ വിവാദങ്ങള്‍ക്കാണ് തുടക്കമിട്ടിരിക്കുന്നത്. ചിത്രത്തിലൂടെ മറാത്തയിലെ സൈനികരെ താരം ആക്ഷേപിച്ചു എന്നാണ് ആരോപണം.
പരസ്യത്തില്‍ ഒരു മറാത്ത രാജാവായാണ് അക്ഷയ് കുമാര്‍ എത്തുന്നത്. യുദ്ധത്തിനു ശേഷം ഭടന്മാര്‍ക്കൊപ്പം മുഷിഞ്ഞ വസ്ത്രങ്ങള്‍ ധരിച്ച് കൊട്ടാരത്തിലേക്ക് തിരിച്ചെത്തുകയാണ് രാജാവ്. വസ്ത്രത്തിന്റെ പേരില്‍ കളിയാക്കപ്പെടുന്നതിനാല്‍ ഡാന്‍സ് കളിച്ചുകൊണ്ട് വസ്ത്രം അലക്കുന്ന രാജാവിനെയാണ് പരസ്യത്തില്‍ കാണിച്ചിരിക്കുന്നത്. ഇത് സമുദായത്തെ അപകീര്‍ത്തിപ്പെടുന്നതാണ് എന്നാണ് ആരോപണം.
മറാത്ത സംഘടനയായ സംഭാജി ബ്രിഗേഡാണ് നന്‍ഡെഡ് ജില്ലാ കളക്ടര്‍ക്കും വസിറബഡ് പൊലീസിലും പരാതി നല്‍കിയിരിക്കുന്നത്. പരാതി സുപ്രണ്ട് ഓഫിസിലേക്ക് അയച്ചിട്ടുണ്ടെന്നും ഉന്നത ഉദ്യോഗസ്ഥരുമായി ആലോചിച്ച് നടപടിയെടുക്കുമെന്നുമാണ് വസിറാബാദ് പൊലീസ് സ്റ്റേഷനിലെ ഉദ്യോഗസ്ഥന്‍ വ്യക്തമാക്കി.
സോഷ്യല്‍ മീഡിയയില്‍ വലിയ ചര്‍ച്ചയായിരിക്കുകയാണ് പരസ്യം. ധീരന്മാരായ മറാത്ത സൈനികരെ ആക്ഷേപിക്കുകയാണ് അക്ഷയ് കുമാറെന്നാണ് ആരോപണം. നിര്‍മ ബഹിഷ്‌കരിക്കുക എന്നാവശ്യപ്പെട്ടുകൊണ്ടുള്ള ഹാഷ് ടാഗുകളും സോഷ്യല്‍ മീഡിയയില്‍ വ്യാപകമാണ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
