ബിജെപി സർക്കാരിന്റെ കടുത്ത വിമർശകനാണ് സംവിധായകൻ അനുരാഗ് കശ്യപ്. ഇപ്പോൾ ആഭ്യന്തരമന്ത്രി അമിതി ഷാക്കെതിരേ രൂക്ഷ വിമർശനവുമായി രംഗത്തെത്തിയിരിക്കുകയാണ് അനുരാഗ്. അമിത് ഷായെ മൃഗമെന്ന് വിളിച്ചുകൊണ്ടാണ് താരത്തിന്റെ പുതിയ ട്വീറ്റ്. ചരിത്രം ഈ മൃഗത്തിന് നേരെ തുപ്പും എന്നാണ് അനുരാഗ് കുറിച്ചിരിക്കുന്നത്.
'നമ്മുടെ ആഭ്യന്തര മന്ത്രി എത്ര വലിയ ഭീരുവാണ്. അയാളുടെ പോലീസ്, അയാളുടെ വാടകഗുണ്ടകള്‍, അയാളുടെ സ്വന്തം സൈന്യം. എന്നിട്ടും സ്വന്തം സുരക്ഷ വര്‍ധിപ്പിക്കുന്നത് നിരായുധരായ പ്രതിഷേധക്കാരെ ആക്രമിച്ചു കൊണ്ടാണ്. അപകര്‍ഷതാ ബോധത്തിന്റെയും നിലവാരമില്ലായ്മയുടെയും പരിധി അമിത് ഷാ ലംഘിച്ചു. ചരിത്രം ഈ മൃഗത്തിന്റെ മുഖത്ത് തുപ്പും.' അനുരാഗ് കശ്യപ് കുറിച്ചു.
ഡൽഹിയിലെ ബിജെപിയുടെ തെരഞ്ഞെടുപ്പ് റാലിക്കിടെ പൗരത്വനിയമത്തിനെതിരെ മുദ്രാവാക്യം വിളിച്ച യുവാക്കളെ ഒരു കൂട്ടമാളുകള്‍ സംഘം ചേര്‍ന്ന് മര്‍ദ്ദിച്ചിരുന്നു. ഈ സംഭവവുമായി ബന്ധപ്പെട്ടാണ് താരത്തിന്റെ ട്വീറ്റ്. പൗരത്വ നിയമ ഭേദഗതിക്കെതിരേ ശക്തമായി സമര രംഗത്തുള്ള താരമാണ് അനുരാഗ് കശ്യപ്. ബിജെപിയുടെ വിമർശകനായ അദ്ദേഹം സോഷ്യൽ മീഡിയയിൽ രൂക്ഷ ആക്രമണത്തിന് ഇരയാകാറുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
