നടി ജാൻവി കപൂർ പ്രധാനവേഷത്തിലെത്തുന്ന 'ഗുൻജൻ സക്‌സേന: ദി കാർഗിൽ ഗേൾ' സ്വാതന്ത്ര്യദിനമായ ഓഗസ്റ്റ് 15ന് റിലീസിനെത്തും. നെറ്റ്ഫ്ലിക്സിലാണ് സിനിമയുടെ റിലീസ്. കോവിഡ് പശ്ചാത്തലത്തിൽ തിയറ്ററുകൾ അടഞ്ഞുകിടക്കുന്നതിനാലാണ് ഒടിടി റിലീസ് അണിയറപ്രവർത്തകർ തിരഞ്ഞെടുത്തത്.
ആദ്യമായി യുദ്ധമുഖത്തേക്ക് വിമാനം പറത്തിയ വനിത ഗുൻജൻ സക്‌സേനയുടെ ജീവിതം പ്രമേയമാക്കി ഒരുങ്ങുന്ന സിനിമയാണ് ഇത്. 1999 കാർഗിൽ യുദ്ധസമയത്ത് പരിക്കേറ്റ ഇന്ത്യൻ ഭടന്മാരെയും കൊണ്ട് അതിർത്തിയിൽ നിന്ന് ആശുപത്രികളിലേക്ക് ഹെലികോപ്റ്റർ പറത്തിയത് ഗുൻജൻ ആണ്. നേരിട്ട് യുദ്ധം ചെയ്തില്ലെങ്കിലും ധീരമായ ഈ പ്രവൃത്തിക്ക് പിന്നീട് രാജ്യം ശൗര്യചക്ര നൽകി ഗുൻജനെ ആദരിക്കുകയുണ്ടായി.ശൗര്യചക്ര ലഭിക്കുന്ന ആദ്യത്തെ വനിതയാണിവർ.
വ്യോമസേനയുടെ വനിതാ ഫൈറ്റർ പൈലറ്റുമാരുടെ 25 പേരടങ്ങുന്ന ആദ്യബാച്ചിലെ അംഗമായിരുന്നു ഗുൻജൻ. കാർഗിൽ ഹെലികോപ്റ്റർ സേവനത്തിന് സേന നിയോഗിച്ച ആദ്യ വനിതാപൈലറ്റും ഇവരായിരുന്നു. ഇവരുടെ സാഹസികമായ ജീവിതകഥയാണ് സിനിമയിലൂടെ അവതരിപ്പിക്കുന്നത്. ശരൺ ശർമയാണ് ചിത്രം സംവിധാനം ചെയ്തിരിക്കുന്നത്. ധർമ്മ പ്രൊഡക്ഷൻസും സീ സ്റ്റുഡിയോസും ചേർന്നാണ് നിർമ്മാണം. സിനിമയുടെ ട്രെയിലർ ഈ മാസം പുറത്തുവിടുമെന്നാണ് അണിയറപ്രവർത്തകർ അറിയിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
