'ഏറ്റവും ആവശ്യം ശുചിത്വമാണ്', ബ്രേക്ക് ദി ചെയിന്‍ ക്യാംപെയിനില്‍ പങ്കാളിയായി മഞ്ജു, വിഡിയോ
By സമകാലിക മലയാളം ഡെസ്‌ക്‌ | Published: 15th March 2020 07:45 PM |
Last Updated: 15th March 2020 07:45 PM | A+A A- |
കൊറോണ വ്യാപനം തടയാന്‍ സംസ്ഥാന സര്‍ക്കാര്‍ അവതരിപ്പിച്ച ബോധവത്കരണ ക്യാംപെയിന്‍ ബ്രേക്ക് ദി ചെയിനില്‍ പങ്കാളിയായി നടി മഞ്ജു വാര്യര്‍. കൊറോണ വൈറസ് വ്യാപനത്തെക്കുറിച്ചും കൈകള്‍ ശുചിയായി സൂക്ഷിക്കേണ്ടതിന്റെ പ്രാധാന്യത്തെക്കുറിച്ചും പറഞ്ഞുകൊണ്ടാണ് മഞ്ജു ക്യാംപെയിനില്‍ ഭാഗമായത്. "ഒരാളില്‍ നിന്ന് മറ്റൊരാളിലേക്ക് ഒരു ചെയിന്‍ കണക്കെയാണ് കൊറോണ വൈറസ് പടര്‍ന്നുപിടിക്കുന്നത്. ഈ ചെയിന്‍ കേരളത്തില്‍ നമുക്ക് ബ്രേക്ക് ചെയ്യാന്‍ സാധിക്കും, സാധിക്കണം. അതിന് ഏറ്റവും ആവശ്യം ശുചിത്വമാണ്", മഞ്ജു പറഞ്ഞു.
കൈകള്‍ ഏറ്റവും ശുചിയായും വൃത്തിയായും സൂക്ഷിക്കുകയാണ് ഇതിനുള്ള പ്രതിവിധിയെന്നും താരം കൂട്ടിച്ചേര്‍ത്തു. "കൈകള്‍ കൂടെകൂടെ സോപ്പും വെള്ളവുമുപയോഗിച്ച് 20 സെക്കന്‍ഡ് നേരം കഴുക്കുക. ആല്‍ക്കഹോള്‍ അടങ്ങിയിട്ടുള്ള ഹാന്‍ഡ് സാനിറ്റൈസറുകള്‍ ഉപയോഗിക്കുക. ഇതുവഴി ഈ വൈറസിന്റെ വ്യാപനം നമുക്ക് തടയാന്‍ സാധിക്കും. ബ്രേക്ക് ദി ചെയിന്‍", മഞ്ജു വിഡിയോയില്‍ പറഞ്ഞു.
കേരളത്തിലുടനീളം ഹാന്‍ഡ് ഹൈജീന്‍ ഉറപ്പാക്കാനുള്ള ക്യാംപെയിനാണ് ബ്രേക്ക് ദി ചെയിന്‍. വൈറസ് ബാധ പിടിപെട്ടയാള്‍ മറ്റൊരാള്‍ക്ക് ഹസ്തദാനം നല്‍കിയാലോ മറ്റേതെങ്കിലും പ്രതലത്തില്‍ തൊട്ടാലോ അവിടെ വൈറസ് കടന്നുകൂടും. ഇത് ഒരാളില്‍ നിന്ന് മറ്റൊരാളിലേക്ക് വളരെ വേഗം വൈറസ് പടരാന്‍ ഇടയാകും. ഇത്തരം സാഹചര്യം ഒഴിവാക്കാനുള്ള ബോധവത്കരണം ആയാണ് ബ്രേക്ക് ദി ചെയിന്‍ അവതരിപ്പിച്ചിരിക്കുന്നത്.
കൊറോണയ്‌ക്കെതിരെയുള്ള പോരാട്ടം നയിക്കുന്ന ആരോഗ്യമന്ത്രിക്കും സര്‍ക്കാരിനും അഭിനന്ദനം അറിയിക്കാനും മഞ്ജു മറന്നില്ല. ബ്രേക്ക് ദി ചെയിന്‍ എന്ന ഹാഷ്ടാഗോടെയാണ് താരം വിഡിയോ പങ്കുവച്ചിരിക്കുന്നത്.
