കൊറോണ ഭീതിയിലായതോടെ സർക്കാരും ആരോഗ്യ പ്രവർത്തകരും പ്രധാനമായി നിർദേശിക്കുന്നത് കൈ കഴുകാനാണ്. എന്നാൽ ഇപ്പോൾ കൈ കഴുകിയതിന്റെ പേരിൽ സോഷ്യൽ മീഡിയയിൽ രൂക്ഷമായ ആക്രമണത്തിന് ഇരയാവുകയാണ് നടിയും എംപിയുമായ നുസ്രത് ജഹാൻ. സെഫ് ഹാൻഡ്സ് ചലഞ്ചിന്റെ ഭാഗമായാണ് താരം കൈകഴുകുന്ന വിഡിയോ സോഷ്യൽ മീഡിയയിൽ പോസ്റ്റ് ചെയ്തത്. കൈ കഴുകേണ്ടതിന്റെ ആവശ്യകതയെക്കുറിച്ചും നുസ്രത്ത് പറയുന്നുണ്ട്.
എന്നാൽ നുസ്രത്ത് കൈ കഴുകി വെറുതെ വെള്ളം പാഴാക്കുകയാണ് എന്നാണ് ഒരു വിഭാഗത്തിന്റെ ആരോപണം. ഇതിന്റെ പേരിൽ രൂക്ഷ ആക്രമണത്തിനാണ് നുസ്രത്ത് സോഷ്യൽ മീഡിയയിൽ ഇരയാകുന്നത്. കൈ കഴുകുന്നതിന്റെ പ്രധാന്യത്തെ പറ്റി പറയുന്നതോടൊപ്പം എംപി വെള്ളം പാഴാക്കിയെന്നാണ് വിമർശനം. വെള്ളം കരുതലോടെ ഉപയോഗിക്കണമെന്ന് അറിയില്ലേയെന്ന് ചോദിച്ചവരുമുണ്ട്. സോപ്പുപയോഗിച്ച് തേക്കുന്ന സമയത്ത് ടാപ്പ് അടച്ചൂടെ എന്നാണ് ചിലരുടെ ചോദ്യം. കൂടാതെ സാനിറ്റൈസർ ഉപയോഗിച്ചാൽ വെള്ളം പാഴാക്കേണ്ടെന്ന ഉപദേശവും നുസ്രത്തിന് കിട്ടുന്നുണ്ട്.
എന്നാൽ നുസ്രത്തിനെ പിന്തുണച്ചുകൊണ്ടും പ്രശംസിച്ചുകൊണ്ടും നിരവധി പേർ രംഗത്തെത്തുന്നുണ്ട്. സച്ചിൻ അടക്കമുള്ള സെലിബ്രിറ്റികൾ സമാന വിഡിയോ പങ്കുവച്ചപ്പോൾ ഉയരാത്ത വിമർശനം ഇപ്പോൾ എന്തുകൊണ്ട് ഉയരുന്നു എന്നാണ് നുസ്രത്തിനെ പിന്തുണയ്ക്കുന്നവരുടെ ചോദ്യം.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
