റോഷൻ ആൻഡ്രൂസിന്റെ കരിയറിലെ മികച്ച സിനിമയായാണ് മുംബൈ പൊലീസ് കണക്കാക്കുന്നത്. ഇന്ന് ചിത്രം പുറത്തിറങ്ങിയിട്ട് ഏഴ് വർഷം പൂർത്തിയാക്കുകയാണ്. ഇപ്പോൾ തന്റെ പുതിയ സ്വപ്നത്തെക്കുറിച്ച് മനസു തുറക്കുകയാണ് റോഷൻ ആൻഡ്രൂസ്. ദുൽഖർ സൽമാൻ നായകനായി എത്തുന്ന ചിത്രമാണ് താരത്തിന്റെ പുതിയ സ്വപ്നം. ബോബി- സഞ്ജയ് തിരക്കഥ ഒരുക്കുന്ന ചിത്രം ത്രില്ലർ ഗണത്തിൽപ്പെടുന്നതാണ്.
ഏഴ് വർഷം പൂർത്തിയാക്കിയതിന്റെ സന്തോഷം പങ്കുവെച്ചുകൊണ്ടാണ് റോഷൻ ആൻഡ്രൂസ് പുതിയ ചിത്രത്തെക്കുറിച്ച് ഫേയ്സ്ബുക്കിൽ കുറിച്ചത്. "മുംബൈ പൊലീസിന്റെ ഏഴ് വര്ഷങ്ങള്! ദൈവമേ! ആളുകള് ഈ വര്ക്കിനെക്കുറിച്ച് സംസാരിക്കുന്നു. ബോബി, സഞ്ജയ്, പൃഥ്വി, ജയസൂര്യ, റഹ്മാന്, കുഞ്ചന് ചേട്ടാ, അപര്ണ, ഹിമ, ദിവാകരന് (ഛായാഗ്രാഹകന്), മറ്റ് സാങ്കേതിക പ്രവര്ത്തകര്, നിര്മ്മാതാക്കള്.. എല്ലാവര്ക്കും ഒരുപാട് നന്ദി. അടുത്തത് ദുല്ഖറിനൊപ്പമുള്ള ഒരു ത്രില്ലര് ആണ്. ബോബി-സഞ്ജയ് എഴുതുന്നത്"- റോഷൻ ആൻഡ്രൂസ് കുറിച്ചു.
പൃഥ്വിരാജ്, ജയസൂര്യ, റഹ്മാൻ എന്നിവരെ പ്രധാന കഥാപാത്രങ്ങളാക്കി ഒരുക്കിയ ചിത്രം മികച്ചവിജയം നേടിയിരുന്നു. പ്രതി പൂവൻകോഴിയാണ് റോഷൻ ആൻഡ്രൂസ് സംവിധാനം അവസാന ചിത്രം. മഞ്ജു വാര്യർ പ്രധാന വേഷത്തിൽ എത്തിയ ചിത്രം വിജയമായിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ