കൊറോണ പടർന്നു പിടിച്ചതോടെ കേരളത്തിലെ പല വീട്ടിലും മുഖ്യമന്ത്രിയുടെ പത്രസമ്മേളനം കൃത്യമായി വെക്കും. രോഗബാധയെക്കുറിച്ചും സർക്കാരിന്റെ പ്രവർത്തനങ്ങളെക്കുറിച്ചും മുഖ്യമന്ത്രി പറയുന്നതു കേൾക്കാൻ കുടുംബസമേതമാണ് ടിവിയ്ക്ക് മുന്നിലിരിക്കുക. നടനും മുൻഎംപിയുമായ ഇന്നസെന്റിന്റെ വീട്ടിലും ഈ പതിവിന് മാറ്റമില്ല. മകന്റെ കുട്ടികൾക്കൊപ്പമിരുന്നാണ് ഇന്നസെന്റ് വാർത്താസമ്മാനം കണ്ടിരുന്നത്.
തന്റെ പേരക്കുട്ടികളുടെ സാമൂഹിക ബോധമോർത്ത് അദ്ദേഹം അഭിമാനിക്കുകയും ചെയ്തു. എന്നാൽ തങ്ങളുടെ കുട്ടികൾ തന്നെ അവരുടെ ഉദ്ദേശം വെളിപ്പെടുത്തുകയായിരുന്നു. വനിതയ്ക്ക് നൽകിയ അഭിമുഖത്തിലാണ് താരം ചെറുമക്കൾക്ക് മുഖ്യമന്ത്രിയുടെ വാർത്താസമ്മേളനത്തെക്കുറിച്ചുള്ള താൽപ്പര്യം പങ്കുവെച്ചത്.
എന്റെ മകൻ സോണറ്റിന് ഇരട്ടക്കുട്ടികളാണ്. ഇന്നസെന്റും അന്നയും. രണ്ട് കുട്ടികളും മുഖ്യമന്ത്രിയുടെ വാര്‍ത്താ സമ്മേളനം കേള്‍ക്കാൻ എല്ലാ ദിവസവും വരും. ഹാവൂ, എന്റെ പേരക്കുട്ടികള്‍ക്ക് ഇത്രേം സാമൂഹിക ബോധമോ. അഭിമാനം സഹിക്ക വയ്യാതെ ഞാൻ നാലഞ്ചാളോട് ഫോണില്‍ വിവരം പറഞ്ഞു. ഇതുകേട്ട് ഒരു ദിവസം അവര്‍ എന്നോട് പറഞ്ഞു. എന്രെ പൊന്നപ്പാപ്പ സാമൂഹിക ബോധം കൊണ്ടൊന്നുമല്ല, സ്‍കൂള്‍ എങ്ങാനും തുറക്കുമോന്ന് അറിയാനാ ഞങ്ങള് വന്നിരിക്കുന്നത്. അത് കേട്ടപ്പോള്‍ ഒരു കാര്യം ഉറപ്പായി. ഇവര്‍ അപ്പാപ്പന് ചേര്‍ന്ന പേരക്കുട്ടികള്‍ തന്നെ- ഇന്നസെന്റ് പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
