അന്യസംസ്ഥാന തൊഴിലാളികള്‍ക്ക് നാട്ടിലേക്ക് പോകാനായി ബസ്സുകള്‍ ഒരുക്കി നല്‍കി കയ്യടി നേടിയ ബോളിവുഡ് നടനാണ് സോനു സൂദ്. തുടര്‍ന്ന് സഹായം ആവശ്യപ്പെട്ടുകൊണ്ട് താരത്തിന്റെ സോഷ്യല്‍ മീഡിയ അക്കൗണ്ടുകളിലേക്ക് നിരവധി പേരുടെ കമന്റുകള്‍ എത്തിയിരുന്നു. വിവിധ നഗരങ്ങളില്‍ കുടുങ്ങിയ അന്യ സംസ്ഥാന തൊഴിലാളികളും വിദ്യാര്‍ത്ഥികളുമെല്ലാം സോനുവിനോട് സഹായം ചോദിച്ചിരുന്നു. ഇതില്‍ നിരവധി പേര്‍ക്ക് താരം സഹായം ഉറപ്പുവരുത്തുകയും ചെയ്തു. ഇപ്പോള്‍ സോഷ്യല്‍ മീഡിയയില്‍ വൈറലാകുന്നത് താരത്തിന്റെ ടാഗ് ചെയ്ത് ഒരു വിരുതനിട്ട ട്വീറ്റും അതിന് താരം നല്‍കിയ മറുപടിയുമാണ്.
സോനു ഭായ്, ഞാന്‍ വീട്ടില്‍ കുടുങ്ങിക്കിടക്കുകയാണ്, ദയവായി എന്നെ മദ്യശാലയില്‍ എത്തിക്കൂ- എന്നായിരുന്നു ട്വീറ്റ്. ഇതിന് രസകരമായി തന്നെയാണ് താരം മറുപടി പറഞ്ഞത്. ഭായ്, നിങ്ങളെ മദ്യശാലയില്‍ നിന്ന് വീട്ടിലെത്താന്‍ എനിക്ക് സഹായിക്കാനാവും. ആവശ്യം വരുമ്പോള്‍ എന്നെ അറിയിച്ചാല്‍ മതി- താരം കുറിച്ചു. എന്തായാലും സോനുവിന്റെ മറുപടി ആരാധകരുടെ മനസു കീഴടക്കുകയാണ്.
കൊറോണ പ്രതിരോധ പ്രവര്‍ത്തനങ്ങളില്‍ മുന്‍പന്തിയിലാണ് സോനു സൂദ്. അന്യ സംസ്ഥാന തൊഴിലാളികള്‍ക്ക് നാട്ടിലേക്ക് പോകാനായി ബസ്സുകള്‍ ഏര്‍പ്പാടാക്കിയതിന് പുറമേ ജുഹുവിലെ അദ്ദേഹത്തിന്റെ ഹോട്ടല്‍ ആരോഗ്യപ്രവര്‍ത്തകര്‍ക്കായി തുറന്നു കൊടുത്തിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
