പിറന്നാളിന് കിട്ടിയ സർപ്രൈസിന്റെ സന്തോഷം ആരാധകരുമായി പങ്കുവച്ചിരിക്കുകയാണ് മലയാളികളുടെ പ്രിയനടി നവ്യ നായർ. വീട്ടുകാർ നൽകിയ പിറന്നാൾ സർപ്രൈസിന്റെ വിഡിയോ ആണ് നവ്യ സോഷ്യൽ മീഡിയയിൽ ഷെയർ ചെയ്തിരിക്കുന്നത്. മാതാപിതാക്കളും അനുജനും മകനും സുഹൃത്തുക്കളും ചേർന്നാണ് നവ്യയ്ക്കായി ആഘോഷങ്ങൾ ഒരുക്കിയത്.
കണ്ണ് കെട്ടിയാണ് നവ്യയെ സർപ്രൈസ് ഒരുക്കിയിരുന്ന മുറിയിലേക്ക് എത്തിച്ചത്. പ്രതീക്ഷിക്കാതെ ലഭിച്ച സർപ്രൈസ് കണ്ട് ആദ്യം അമ്പരന്നെങ്കിലും പിന്നീട് സന്തോഷത്തിൽ കണ്ണുനിറയുന്ന നവ്യയെയാണ് വിഡിയോയിൽ കാണാൻ കഴിയുക. പിന്നീട് സുഹൃത്തുക്കളും പ്രിയപ്പെട്ടവരുമെല്ലാം നവ്യയ്ക്ക് ആശംസകൾ നേരുന്ന വിഡിയോ ടിവിയിൽ തെളിഞ്ഞു. നിറ കണ്ണുകളോടെയാണ് നവ്യ വിഡിയോ കണ്ടുതീർത്തത്. നവ്യയൊഴിച്ച് വീട്ടിലെ മറ്റെല്ലാവർക്കും സർപ്രൈസിനെക്കുറിച്ച് അറിയാമെന്ന് മകൻ സായികൃഷ്ണ പറയുന്നതും വിഡിയോയിൽ കേൾക്കാം.
വിവാഹത്തോടെ അഭിനയത്തിൽ നിന്ന് വിട്ടുനിന്ന നവ്യ ഒരു ഇടവേളയ്ക്ക് ശേഷം വീണ്ടും ക്യാമറയ്ക്ക് മുന്നിലേക്കെത്തുകയാണ്. വി കെ പ്രകാശ് സംവിധാനം ചെയ്യുന്ന ഒരുത്തി എന്ന ചിത്രത്തിലൂടെയാണ് മടങ്ങിവരവ്. ബോട്ടിലെ കണ്ടക്ടറായ വീട്ടമ്മയുടെ വേഷമാണ് ചിത്രത്തിൽ നവ്യ അവതരിപ്പിക്കുന്നത്. നവ്യയ്ക്കൊപ്പം വിനായകൻ, സന്തോഷ് കീഴാറ്റൂർ, മുകുന്ദൻ, ജയശങ്കർ, മനു രാജ് , മാളവിക മേനോൻ, കൃഷ്ണപ്രസാദ് എന്നിങ്ങനെ ഒരു വലിയ താരനിര തന്നെ ചിത്രത്തിൽ അണിനിരക്കുന്നുണ്ട്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ