'മാധവൻ മയക്കുമരുന്നിനും മദ്യത്തിനും അടിമ, കരിയർ തകർത്തു'; ആരോപണത്തിന് മറുപടിയുമായി താരം

തന്നെ സോഷ്യൽ മീഡിയയിലൂടെ അപമാനിക്കാൻ ശ്രമിച്ച ആൾക്ക് മറുപടിയുമായി മാധവൻ. താരം മദ്യപാനത്തിനും മയക്കുമരുന്നിനും അടിമയായിരുന്നെന്നും അതാണ് കരിയർ തകർത്തത് എന്നുമായിരുന്നു ഇയാളുടെ ആരോപണം. ഈ ട്വീറ്റ് സോഷ്യൽ മീഡിയയിൽ വൈറലായതിന് പിന്നാലെയാണ് താരം തന്നെ മറുപടിയുമായി രം​ഗത്തെത്തിയത്. 

മാഡിയുടെ ആരാധകനായിരുന്നു ഞാന്‍. എന്നാല്‍ മദ്യത്തിനും മയക്കുമരുന്നിനും അടിമയായി അദ്ദേഹം സ്വന്തം കരിയര്‍ തകര്‍ത്തത് തികച്ചും ഹൃദയഭേദകമാണ്‌. ബോളിവുഡില്‍ എത്തിയതിന് ശേഷമാണ് മാധവന്‍ നശിച്ചത് എന്നായിരുന്നു 'ആരാധകന്റെ കണ്ടെത്തൽ'. ഈ ട്വീറ്റ് വ്യാപകമായി റീട്വീറ്റ് ചെയ്യപ്പെടുകയും വലിയ ചർച്ചകൾക്ക് കാരണമാവുകയും ചെയ്തു. അതോടെയാണ് താരത്തിന്റെ മറുപടി എത്തിയത്. 

ഓ.. ഇതാണോ നിങ്ങളുടെ രോഗനിര്‍ണ്ണയം? എനിക്ക് നിങ്ങള്‍ രോഗികളുടെ കാര്യം ആലോചിച്ച് വിഷമം തോന്നുന്നു. നിങ്ങള്‍ക്കാണ് ഒരു ഡോക്ടറെ കാണേണ്ടതിന്റെ ആവശ്യമെന്ന് തോന്നുന്നു- മാധവൻ കുറിച്ചു. തന്നെക്കുറിച്ചുള്ള ആരോപണത്തിന്റെ ട്വീറ്റ് ഷെയർ ചെയ്തുകൊണ്ടായിരുന്നു പ്രതികരണം. താരത്തിന് പിന്തുണയുമായി നിരവധി പേർ രം​ഗത്തെത്തി. ഒരു കാരണവുമില്ലാതെ ഇത്തരത്തിൽ വ്യക്തിഹത്യ ചെയ്യുന്നവർക്കെതിരെ നടപടിയെടുക്കണമെന്ന് അവർ ആവശ്യപ്പെട്ടു. അതിന് പിന്നാലെ ആ അക്കൗണ്ടു  തന്നെ അപ്രത്യക്ഷമായി. 

Oh .. So that’s your diagnoses ? I am worried for YOUR patients. . May be you need a Docs appointment. . https://t.co/YV7dNxxtew

— Ranganathan Madhavan (@ActorMadhavan) January 5, 2021

മാധവന്റെ പുതിയ ചിത്രം മാര ഓൺലൈനിലൂടെ റിലീസിന് ഒരുങ്ങുകയാണ്. ആമസോൺ പ്രൈമിലൂടെ ജനുവരി എട്ടിനാണ് ചിത്രം ആരാധകരിലേക്ക് എത്തുന്നത്. ദുൽഖർ സൽമാനും പാർവതിയും പ്രധാന കഥാപാത്രങ്ങളായി എത്തിയ മാർട്ടിൻ പ്രക്കാട്ടിന്റെ ചാർളിയുടെ റീമേക്കാണ് ചിത്രം.