'നിങ്ങളെ തൊഴുന്നു', പ്രിയങ്ക ചോപ്രയേയും രാജ്കുമാര്‍ റാവുവിനേയും പ്രശംസിച്ച് ഹൃത്വിക്

പ്രിയങ്ക ചോപ്രയും രാജ്കുമാര്‍ റാവുവും പ്രധാന വേഷത്തില്‍ എത്തിയ വൈറ്റ് ടൈഗര്‍ കഴിഞ്ഞ ദിവസമാണ് റിലീസ് ചെയ്തത്. നെറ്റ്ഫഌക്‌സിലൂടെ എത്തിയ ചിത്രത്തിന് മികച്ച അഭിപ്രായമാണ് ലഭിക്കുന്നത്. ഇപ്പോള്‍ ചിത്രത്തിലെ പ്രിയങ്കയുടേയും രാജ്കുമാറിന്റേയും പ്രകടനത്തെ പുകഴ്ത്തിക്കൊണ്ട് രംഗത്തെത്തിയിരിക്കുകയാണ് നടന്‍ ഹൃത്വിക് റോഷന്‍. സിനിമ കണ്ടതിന് ശേഷമായിരുന്നു താരത്തിന്റെ ട്വീറ്റ്. 

തന്റെ സുഹൃത്തുക്കളായ പ്രിയങ്കയുടേയും രാജ്കുമാര്‍ റാവുവിന്റേയും ഗംഭീര പ്രകടനം. നിങ്ങളെ രണ്ടുപേരേയും തൊഴുന്നു എന്നാണ് താരം കുറിച്ചത്. കൂടാതെ ചിത്രത്തിലെ മറ്റൊരു പ്രധാന കഥാപാത്രത്തെ അവതരിപ്പിച്ച ആദര്‍ശ് ഗൗരവിനേയും ഹൃത്വിക് പ്രശംസിച്ചു. മികച്ച കണ്ടുപിടുത്തമാണ് ഗൗരവ് എന്നാണ് താരം പറഞ്ഞത്. കൂടാതെ വൈറ്റ് ടൈഗറിന്റെ സംവിധായകന്‍ റാമിന്‍ ബെഹ്‌റാനിയേയും അണിയറ പ്രവര്‍ത്തകരേയും പ്രശംസിക്കാനും മറന്നില്ല. 

Friday done right with The White Tiger! Brilliant performances by my friends @priyankachopra, @rajkummarrao. Take a bow, you two! @_GouravAdarsh you have been a discovery, what a promising start to the year. Congratulations Rahim Bahrani & team for putting up a good show!

— Hrithik Roshan (@iHrithik) January 29, 2021

മാന്‍ ബുക്കര്‍ പുരസ്‌കാരം നേടിയ അരവിന്ദ് അഡിഗയുടെ വൈറ്റ് ടൈഗര്‍ നോവലിന്റെ സിനിമാ ആവിഷ്‌കാരമാണിത്. ചിത്രത്തിന് മികച്ച അഭിപ്രായമാണ് നേടുന്നത്. ബോളിവുഡിലെ ഹിറ്റ് താരജോഡികളാണ് പ്രിയങ്കയും ഹൃത്വിക് റോഷനും. ഇരുവരും ഒന്നിച്ച കൃഷ്, അഗ്നീപത്, കൃഷ് 3 എന്നിവയെല്ലാം മികച്ച വിജയമായിരുന്നു.