തിരക്കഥാകൃത്തും സംവിധായകനുമായിരുന്നു സച്ചിയുടെ അപ്രതീക്ഷിത വിയോഗത്തിന് ഒരു വർഷം തികയുകയാണ്. കഴിഞ്ഞ വർഷം ജൂൺ 18നാണ് ഹൃദയാഘാതത്തെ തുടർന്ന് സച്ചി വിടപറയുന്നത്. സംവിധാനം ചെയ്ത രണ്ടാമത്തെ ചിത്രം അയ്യപ്പനും കോശിയും വലിയ വിജയമായി മാറിയതിന് പിന്നാലെയായിരുന്നു മരണം. കഴിഞ്ഞ വർഷം മലയാള സിനിമയ്ക്കുണ്ടായ ഏറ്റവും വലിയ നഷ്ടമായാണ് സച്ചിയുടെ വേർപാടിനെ കണക്കാക്കുന്നത്. പ്രിയപ്പെട്ട സച്ചിയുടെ ഒന്നാം ചരമ വാർഷികത്തിൽ അദ്ദേഹത്തിന്റെ ഓർമകളുമായി നിരവധി താരങ്ങളാണ് എത്തുന്നത്.
ഇപ്പോൾ സച്ചിയോടൊപ്പമുള്ള ചിത്രം പങ്കുവെച്ചിരിക്കുകയാണ് നടൻ ലാൽ. സച്ചിയ്ക്കൊപ്പം ആഘോഷിക്കുന്നതിന്റെ രസകരമായ ചിത്രമാണിത്. കാബൂളിവാല എന്ന ചിത്രത്തിലെ പാൽനിലാവിനും എന്ന ഗാനത്തിലെ രണ്ടുവരികൾക്കൊപ്പമാണ് താരത്തിന്റെ പോസ്റ്റ്. 'സാഗരം മനസ്സിലുണ്ടെങ്കിലും കരയുവാന് ഞങ്ങളില് കണ്ണുനീരില്ല'- എന്നാണ് ലാൽ കുറിച്ചത്.
ഷർട്ടിടാതെ ലാലിന്റെ കഴുത്തിലൂടെ കയ്യിട്ട് ചിരിച്ചു നിൽക്കുന്നതാണ് ചിത്രം. ലാൽ പ്രധാന വേഷത്തിൽ എത്തിയ ചേട്ടായീസ് എന്ന ചിത്രത്തിന്റെ തിരക്കഥാകൃത്തായിരുന്നു സച്ചി. സിനിമയിൽ ശക്തമായ സൗഹൃദ വലയവും സച്ചിക്കുണ്ടായിരുന്നു. പൃഥ്വിരാജ്, ബിജു മേനോൻ ഉൾപ്പടെ നിരവധി പേരാണ് പ്രിയ കലാകാരനെ ഓർമിച്ചുകൊണ്ട് കുറിപ്പുകൾ പങ്കുവെച്ചിരിക്കുന്നത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ