അടുത്തിടെ മമ്മൂട്ടിയുടെ സ്റ്റൈലിഷ് ലുക്കുകളെല്ലാം ആരാധകരുടെ മനം കവർന്നിരുന്നു. കഴിഞ്ഞ ദിവസം നടന്ന ദി പ്രീസ്റ്റിന്റെ പ്രസ് കോൺഫറൻസിലും ചുള്ളനായാണ് സൂപ്പർതാരം എത്തിയത്. ഇത്തവണ മമ്മൂട്ടിയുടെ കൂളിങ് ഗ്ലാസും താടിയും ഷർട്ടുമൊന്നുമല്ല ശ്രദ്ധിക്കപ്പെട്ടത്. താരമായത് മാസ്കാണ്. മാസ് അണിഞ്ഞുകൊണ്ടുള്ള മമ്മൂട്ടിയുടെ ചിത്രങ്ങൾ വൈറലാവുകയാണ്.
തെങ്ങിന്റെ പ്രിന്റിലുള്ളതാണ് സ്റ്റൈലൻ മാസ്ക്. മമ്മൂട്ടിയുടെ ചിത്രങ്ങൾ ഹിറ്റായതോടെ മാസ്ക് ഏതാണെന്ന് അന്വേഷിച്ച് ആരാധകരും രംഗത്തിറങ്ങി. ഹ്യൂഗോ ബോസ് ന്യൂ സീസൺ പ്രിന്റ് മാസ്കായിരുന്നു താരം ധരിച്ചിരുന്നത്. ഈ മാസ്ക് ഓൺലൈൻ വിപണിയിൽ വിൽപ്പനയ്ക്ക് ലഭ്യമാണ്. ഇതേ പ്രിന്റുള്ള മാസ്കിന്റെവില എത്രയെന്ന് വെബ്‌സൈറ്റിൽ നിലവിൽ ലഭ്യമല്ല. പക്ഷെ ഈ ശ്രേണിയിലെ മാസ്കുകൾക്ക് ഏറ്റവും കുറഞ്ഞത് 25 ഡോളർ അഥവാ 1,822.78 രൂപയാണ് വില.
ദി പ്രീസ്റ്റിന്റെ റിലീസിനോട് അനുബന്ധിച്ചാണ് മമ്മൂട്ടിയും മഞ്ജു വാര്യരും മറ്റ് അണിയറ പ്രവർത്തകരും ചേർന്ന് പ്രസ് കോൺഫറൻസ് നടത്തിയത്. സെക്കൻഡ് ഷോ അനുവദിച്ചതോടെ മാർച്ച് 11നാണ് സിനിമ റിലീസ് ചെയ്യുന്നത്. മഞ്ജു വാര്യരും മമ്മൂട്ടിയും ആദ്യമായി ഒന്നിച്ചഭിനയിക്കുന്ന ചിത്രമാണിത്. നവാഗതനായ ജോഫിൻ ചോക്കോയാണ് സംവിധാനം നിർവഹിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
