'എന്തിനും ഒരു മര്യാദ വേണ്ടെ', ബൈജു കൊട്ടരക്കരയ്ക്കെതിരെ വക്കീൽ നോട്ടീസ് അയച്ച് അരുൺ ഗോപി
ബൈജു കൊട്ടാരക്കരക്കെതിരെ സംവിധായകൻ അരുണ് ഗോപി വക്കീല് നോട്ടീസ് അയച്ചു. നടിയെ ആക്രമിച്ച കേസുമായി ബന്ധപ്പെട്ടുള്ള ചാനൽ ചർച്ചയ്ക്കിടയിൽ അപകീർത്തിപരമായ പ്രസ്താവന നടത്തിയെന്ന് ആരോപിച്ചാണ് നടപടി. അപകീർത്തി കേസുമായി മുന്നോട്ടുപോകുമെന്നും അരുൺ ഗോപി വ്യക്തമാക്കി.
അരുൺ ഗോപിയുടെ ഫോൺ ദിലീപ് അമേരിക്കയിലേക്ക് അയച്ചു
നടിയെ ആക്രമിച്ച കേസുമായി ബന്ധപ്പെട്ട് പ്രമുഖ രാഷ്ട്രീയ നേതാവിന്റെ മകൻ അരുണ് ഗോപിയുടെ മൊബൈലിൽ വിളിച്ചുവെന്നും ആ കോൾ റെക്കോർഡ് ചെയ്ത ശേഷം പിന്നീട് നീക്കം ചെയ്തെന്നുമായിരുന്നു ബൈജുവിന്റെ ആരോപണം. ഈ ഫോൺ കോൾ തിരിച്ചെടുക്കാൻ അരുൺ ഗോപിയുടെ മൊബൈൽ ദിലീപ് അമേരിക്കയ്ക്ക് അയച്ചതായും ചാനൽ ചർച്ചയിൽ ബൈജു കൊട്ടാരക്കര ആരോപിച്ചിരുന്നു.
നിയമനടപടികളുമായി മുന്നോട്ടുപോകും
ഇതിന് പിന്നാലെയാണ് അരുൺഗോപി നിയമനടപടി സ്വീകരിച്ചത്. ഒരാൾക്കെതിരെ എന്തും പറയാമെന്നാണ് ഇവരുടെയൊക്കെ വിചാരം. എന്തിനും ഒരു മര്യാദ വേണ്ടെയെന്നും അരുൺഗോപി ചോദിച്ചു. നടിയെ ആക്രമിച്ച കേസുമായി ബന്ധപ്പെട്ട് നടൻ ദിലീപിനെതിരെ പ്രസ്താവന നടത്തി ഇതിനു മുൻപും ബൈജു കൊട്ടാരക്കര വിവാദത്തിലായിട്ടുണ്ട്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ