പൂവിളി പൂവിളി പൊന്നോണമായി...മലയാള സിനിമയിലെ ഓണാഘോഷങ്ങൾ

മലയാളികളുടെ ഏറ്റവും വലിയ ഗൃഹാതുരത്വങ്ങളിൽ ഒന്നാണ് ഓണം. ഓണത്തിനായി കാത്തിരിക്കുന്നത് പോലെ മറ്റൊരു ഉത്സവത്തിനും ഒരുപക്ഷേ ഇത്രയധികം ഒരുക്കങ്ങളുമായി മലയാളികൾ കാത്തിരുന്നിട്ടുണ്ടാവില്ല. ഇപ്പോഴും ആ ഓണക്കാല കൗതുകത്തിന് ഒരു മാറ്റവും സംഭവിച്ചിട്ടില്ല. നിരവധി സിനിമകളും ഓണക്കാലത്ത് റിലീസിനെത്താറുണ്ട്. ഓണത്തിന്റെ ഓർമ്മകൾ സമ്മാനിക്കുന്ന നിരവധി സിനിമകളും മലയാളത്തിലുണ്ട്.

1975 ൽ ശ്രീകുമാരൻ തമ്പി സംവിധാനം ചെയ്ത ചിത്രത്തിന്റെ പേരും തിരുവോണം എന്നായിരുന്നു. പിന്നെയും വന്നു കുറേ ഓണച്ചിത്രങ്ങൾ. കെ.ജി ജോർജ് സംവിധാനം ചെയ്ത ഓണപ്പുടവ, 1983 ൽ ജെ ശശികുമാർ സംവിധാനം ചെയ്ത മഹാബലി, സുരേഷ് സംവിധാനം ചെയ്ത ഓണത്തുമ്പിക്കൊരു ഊഞ്ഞാൽ തുടങ്ങി നിരവധി ചിത്രങ്ങൾ. ഈ ഓണനാളിൽ മലയാളികൾ നെഞ്ചിലേറ്റിയ ചില ഓണപ്പാട്ടുകളിലൂടെയും, മലയാള സിനിമയിലെ ഓണാഘോഷത്തിലൂടെയും കടന്നുപോകാം.

വർഷം കുറേയായി മലയാളികൾക്ക് ഓണക്കാലത്ത് കൂട്ടിനെത്തുന്ന പാട്ടാണ് പൂവിളി പൂവിളി പൊന്നോണമായി... 1977 ൽ ജെ ശശികുമാർ സംവിധാനം ചെയ്ത വിഷുക്കണി എന്ന ചിത്രത്തിലെ പാട്ടായിരുന്നു ഇത്. ഇന്നും ഓണാഘോഷ വേദികളിൽ ഈ പാട്ടാണ് എല്ലാവരും പാടാറ്. പ്രേം നസീറും വിധുബാലയുമാണ് ചിത്രത്തിൽ പ്രധാന വേഷത്തിലെത്തിയത്. ശ്രീകുമാരൻ തമ്പിയുടെ വരികൾക്ക് സലിൽ ചൗധരിയാണ് സം​ഗീതമൊരുക്കിയത്. യേശുദാസാണ് ​ഗാനം ആലപിച്ചിരിക്കുന്നത്.

ഓണത്തിന്റെ ഓർമകളുടെ ഒരു ഘോഷയാത്ര തന്നെ മനസിലേക്ക് കൊണ്ടുവരുന്ന പാട്ടാണ് പൂ വേണം പൂപ്പട വേണം പൂവിളി വേണം...1987 ൽ ഭരതൻ സംവിധാനം ചെയ്ത ചിത്രത്തിൽ നെടുമുടി വേണു, പാർവതി, ശാരദ എന്നിവരായിരുന്നു പ്രധാന വേഷത്തിൽ. ഒഎൻവിയുടെ വരികൾക്ക് ജോൺസൺ മാഷായിരുന്നു സം​ഗീതമൊരുക്കിയത്.

1990 ൽ കമൽ സംവിധാനം ചെയ്ത ചിത്രമായിരുന്നു ശുഭയാത്ര. ജയറാം, ഇന്നസെന്റ്, പാർവതി, ജ​ഗദീഷ് തുടങ്ങി നിരവധി താരങ്ങൾ ചിത്രത്തിൽ അണിനിരന്നിരുന്നു. ഒരു കൂട്ടം മലയാളികൾ ചേർന്ന് മുംബൈയിലെ ഒറ്റമുറി അപ്പാർട്ട്മെൻ്റിൽ എളിമയോടെ ഓണം ആഘോഷിക്കുന്ന രം​ഗം ഇന്നും മലയാളികൾക്ക് ഏറെ പ്രിയപ്പെട്ടതാണ്.

രാമേട്ടന്റെ റൂമിൽ തിരുവോണത്തിന് ഒത്തുകൂടി വടക്കെന്നോ തെക്കെന്നോ വേർതിരിവില്ലാതെ ഒന്നിച്ചു ഭക്ഷണം പാചകം ചെയ്തും നാട്ടിലെ ഓർമ്മകൾ പങ്കുവെച്ചും സൗഹാർദ്ദപരമായി ആഘോഷിക്കുന്ന രംഗം അതിമനോഹരമായാണ് കമൽ അവതരിപ്പിച്ചിരിക്കുന്നത്.

2015 ൽ അൽഫോൻസ് പുത്രൻ സംവിധാനം ചെയ്ത ചിത്രമായിരുന്നു പ്രേമം. ക്യാംപസിലെ ഓണാഘോഷമായിരുന്നു ചിത്രം കാണിച്ചു തന്നത്. നിവിൻ പോളി, സായ് പല്ലവി തുടങ്ങി നിരവധി യുവതാരങ്ങളാണ് ചിത്രത്തിനായി അണിനിരന്നത്. ചിത്രത്തിലെ കോളജിലെ ഓണാഘോഷ രം​ഗം ക്യാംപസുകളിൽ ഹിറ്റായി മാറിയിരുന്നു. വെള്ളമുണ്ടും കറുത്ത ഷർട്ടും ധരിച്ചായിരുന്നു പിന്നീട് വിദ്യാർഥികൾ ക്യാംപസുകളിൽ ഓണാഘോഷങ്ങൾക്ക് എത്തിയിരുന്നത്.

ജേക്കബിന്റെ സ്വർ​ഗരാജ്യം എന്ന ചിത്രത്തിലെ തിരുവാവണി രാവ്, മനസാകെ നിലാവ്... എന്ന പാട്ടും മലയാളികൾക്ക് ഓണം ഓർമ്മ സമ്മാനിക്കുന്നത് തന്നെ. മനു മഞ്ജിത്തിന്റെ വരികൾക്ക് ഷാൻ റഹ്മാനാണ് സം​ഗീതമൊരുക്കിയിരിക്കുന്നത്.