ജയ്പൂര്‍: പത്മാവതി സിനിമയ്ക്ക് നേരെ ഉയരുന്ന ഭീഷണികളുടെ പശ്ചാത്തലത്തില്‍ ദീപിക പടുക്കോണിന്റെ സുരക്ഷ ശക്തമാക്കി. ശാരീരികമായി ആക്രമിക്കുമെന്ന കര്‍ണി സേനയുടെ ഭീഷണി വന്നതിനെ തുടര്‍ന്നാണ് ദീപികയ്ക്ക് മുംബൈ പൊലീസ് പ്രത്യേക സുരക്ഷ ഒരുക്കിയിരിക്കുന്നത്.
സ്ത്രീകള്‍ക്കെതിരെ രജ്പുത്തുകള്‍ ഒരുക്കലും കയ്യുയര്‍ത്തിയിട്ടില്ല. എന്നാല്‍ ആവശ്യം വന്നാല്‍ ലക്ഷ്മണന്‍ ശൂര്‍പണഘയോട് ചെയ്തത് തങ്ങള്‍ ദീപികയോട് ചെയ്യുമെന്നായിരുന്നു രജ്പുത് കര്‍ണി സേനയുടെ ഭീഷണി. ഇതുകൂടാതെ പത്മാവതിയുടെ റിലീസ് നിശ്ചയിച്ചിരിക്കുന്ന ഡിസംബര്‍ ഒന്നിന് ഭാരത് ബന്ദ് ആചരിക്കുമെന്നും സംഘടന പ്രഖ്യാപിച്ചിരുന്നു.
ദീപികയുടെ വസതിയിലും, മുംബൈയിലെ ഓഫീസിലും സുരക്ഷ ക്രമീകരണങ്ങള്‍ ഏര്‍പ്പെടുത്തുമെന്നാണ് പൊലീസ് വ്യക്തമാക്കുന്നത്. റാണി പത്മിനിയും അലാവുദ്ധീന്‍ ഖില്‍ജിയുമായുള്ള ബന്ധം ചിത്രത്തില്‍ തെറ്റായി വ്യാഖ്യാനിക്കുന്നു എന്നതാണ് സിനിമയ്‌ക്കെതിരെ പ്രതിഷേധം ഉയര്‍ത്തുന്നതിന് സംഘടനകള്‍ കാരണമാക്കുന്നത്.
എന്നാല്‍ ചരിത്രത്തെ തെറ്റായി വ്യാഖ്യാനിക്കുകയാണ് എന്ന ആരോപണം നിഷേധിച്ച സംവിധായകന്‍ സഞ്ജയ് ലീല ബന്‍സാലി സിനിമയുടെ വീഡിയോ പുറത്തുവിട്ട് ആരോപണങ്ങളെ പ്രതിരോധിക്കാന്‍ ശ്രമിച്ചിരുന്നു. എന്നാല്‍ സിനിമയുടെ റിലീസ് അനുവദിക്കില്ലെന്ന നിലപാടിലാണ് സംഘടനകള്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
