ന്യൂഡല്ഹി: മുന് പ്രധാനമന്ത്രി ജവഹര്ലാല് നെഹ്രുവിനെതിരെ വിവാദ പരാമര്ശവുമായി ബിജെപി എം.എല്.എ ഗ്യാന് ദേവ് അഹുജ. നെഹ്റു ഒരിക്കലും ഒരു പണ്ഡിറ്റ് അല്ല. പോത്തിറച്ചിയും പന്നിയിറച്ചിയും കഴിക്കുന്ന ഒരാള്ക്ക് പണ്ഡിറ്റ് ആവാന് കഴിയില്ലെന്നുമാണ് അഹുജയുടെ പുതിയ വാക്കുകള്
ബി.ജെ.പി ആസ്ഥാനം സന്ദര്ശിച്ച ശേഷമായിരുന്നു അഹുജയുടെ പ്രസ്താവന. കോണ്ഗ്രസ് ജാതീയതയുടെ പേരില് തിരഞ്ഞെടുപ്പുകള് നടത്തുകയാണെന്നും അഹുജ ആരോപിച്ചു. ക്ഷേത്രങ്ങള് സന്ദര്ശിക്കാന് രാഹുല് ഗാന്ധി പഠിച്ചത് ഇന്ദിരാ ഗാന്ധിയില് നിന്നാണ് എന്ന രാജസ്ഥാന് പി.സി.സി പ്രസിഡന്റ് സച്ചിന് പൈലറ്റിന്റെ പ്രസ്താവനയോട് പ്രതികരിക്കെയാണ് അഹുജ ഈ പ്രസ്താവന നടത്തിയത്.
രാഹുല് ഗാന്ധി ഇന്ദിരാ ഗാന്ധിയോടൊപ്പം ക്ഷേത്രങ്ങള് സന്ദര്ശിച്ചിട്ടില്ല. ഇത് തെറ്റാണെങ്കില് ഞാന് എന്റെ സ്ഥാനം രാജി വെക്കും. അല്ലാത്ത പക്ഷം സച്ചിന് പൈലറ്റ് അയാളുടെ സ്ഥാനം രാജി വെക്കണം. അഹുജ കൂട്ടിച്ചേര്ത്തു. പശുക്കടത്ത് ഭീകരവാദത്തെക്കാള് വലിയ കുറ്റമാണെന്ന പ്രസ്താവനയിലൂടെയായിരുന്ന അഹുജ ഒടുവില് വാര്ത്തകളില് ഇടം നേടിയത്. ഡല്ഹിയില് നടക്കുന്ന 50 ശതമാനം ബലാത്സംഗങ്ങള്ക്കും കാരണം ജെ.എന്.യു വിദ്യാര്ത്ഥികള് ആണെന്നായിരുന്നു അഹുജയുടെ മറ്റൊരു പ്രസ്താവന.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ