ന്യൂഡല്ഹി: പ്രധാനമന്ത്രി നരേന്ദ്രമോദി ഡിസംബര് 29 ശനിയാഴ്ച ഉദ്ഘാടനം ചെയ്യാനിരിക്കുന്ന അതിവേഗ തീവണ്ടി 'ട്രെയിന് 18'നുനേരെ പരീക്ഷണ ഓട്ടത്തിനിടെ കല്ലേറ്. ഡല്ഹിക്കും ആഗ്രയ്ക്കുമിടെ മണിക്കൂറില് 180 കിലോമീറ്റര് വേഗത്തില് പരീക്ഷണ ഓട്ടം നടത്തുന്നതിനിടെയാണ് കല്ലേറുണ്ടായത്.
കല്ലേറില് തീവണ്ടിയുടെ ജനല്ചില്ല് തകര്ന്നു. കല്ലേറ് നടത്തിയ ആളെ ഉടന് പിടികൂടാന് കഴിയുമെന്നാണ് പ്രതീക്ഷയെന്ന് ഇന്റഗ്രല് കോച്ച് ഫാക്ടറി ജനറല് മാനേജര് സുധാന്ഷു മനു പ്രതികരിച്ചു. കോച്ച് ഫാക്ടറി ചീഫ് ഡിസൈന് എന്ജിനിയര് അടക്കമുള്ളവര് കല്ലേറുണ്ടായ സമയത്ത് തീവണ്ടിയിലുണ്ടായിരുന്നു.
റെയില്വെയുടെ ഏറ്റവും വേഗമേറിയ തീവണ്ടിയും രാജ്യത്തെ എന്ജിനില്ലാത്ത ആദ്യ തീവണ്ടിയുമാണ് ട്രെയിന് 18. ഡല്ഹിക്കും വാരണാസിക്കുമിടെ ശതാബ്ദി ട്രെയിനുകള്ക്ക് പകരമാവും ആദ്യം ഓടുക. 100 കോടി ചിലവഴിച്ചാണ് ഇന്റഗ്രല് കോച്ച് ഫാക്ടറി തീവണ്ടിയുടെ കോച്ചുകള് നിര്മ്മിച്ചത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ