ചെന്നൈ: കാന്സര് കര്മഫലമാണെന്ന് അഭിപ്രായപ്പെട്ട യോഗാധ്യാപകനും വ്യവസായിയുമായ ബാബ രാംദേവിനെ കാന്സര് ഗവേഷണത്തെക്കുറിച്ചുള്ള രാജ്യാന്തര ശില്പ്പശാലയില് മുഖ്യ അതിഥിയാക്കി മദ്രാസ് ഐഐടി. ബാബ മുഖ്യാതിഥിയാണെന്ന വാര്ത്ത വന്നതിനു പിന്നാലെ ശില്പ്പശാലയില്നിന്നു പിന്മാറുകയാണെന്ന് അമേരിക്കയിലെ ആന്ഡേഴ്സണ് കാന്സര് സെന്റര് അറിയിച്ചു.
നാളെ തുടങ്ങാനിരിക്കുന്ന ഏഴാമത് രാജ്യാന്തര കാന്സര് ഗവേഷണ കോണ്ഫറന്സിലാണ് മദ്രാസ് ഐഐടി ബാബ രാംദേവിനെ മുഖ്യാതിഥിയായി ക്ഷണിച്ചത്. കാന്സര് കര്ഫലമാണെന്ന അഭിപ്രായപ്പെട്ടതിലൂടെ വിവാദത്തിലായ രാംദേവിനെ കാന്സര് ശില്പ്പശാലയുടെ മുഖ്യാതിഥിയാക്കിയതു ചൂണ്ടിക്കാട്ടി ന്യൂ ഇന്ത്യന് എക്സ്പ്രസ് വാര്ത്ത പ്രസിദ്ധീകരിച്ചിരുന്നു. ഇതിനു പിന്നാലെയാണ് ശില്പ്പശാലയില്നിന്നു പിന്മാറുകയാണെന്ന് ടെക്സസിലെ എംഡി ആന്ഡേഴ്സണ് കാന്സര് സെന്റര് വ്യക്തമാക്കിയിരിക്കുന്നത്.
മദ്രാസ് ഐഐടിയുടെ പരിപാടിയില് പങ്കാളിയല്ലെന്ന് എംഡി ആന്ഡേഴ്സണ് കാന്സര് സെന്റര് ട്വിറ്ററിലടെ അറിയിച്ചു. സെന്ററിന്റെ ലോഗോയും പേരും അനുമതിയില്ലാതെയാണ് കോണ്ഫറന്സ് സംഘാടകര് ഉപയോഗിച്ചിരിക്കുന്നതെന്നും സെന്റര് വിശദീകരിച്ചു.
കഴിഞ്ഞ നവംബറില് അസം ആരോഗ്യമന്ത്രിയോടൊപ്പം നടത്തിയ ചടങ്ങിലാണ് കാന്സര് കര്മഫലമാണെന്ന് രാംദേവ് അഭിപ്രായപ്പെട്ടത്. യോഗ ചികിത്സകൊണ്ട് ഒട്ടേറെപ്പേറെ കാന്സറില്നിന്ന് മുക്തമാക്കിയിട്ടുണ്ടെന്നും രാംദേവ് അവകാശപ്പെട്ടിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ