രാജ്യത്തിന്റെ ശബ്​ദമാവുകയാണ്​ കോൺഗ്രസി​ന്റെ ദൗത്യം :​ രാഹുൽ ഗാന്ധി

By സമകാലിക മലയാളം ഡെസ്‌ക്‌  |   Published: 22nd July 2018 02:57 PM  |  

Last Updated: 22nd July 2018 03:06 PM  |   A+A-   |  

ന്യൂഡൽഹി: രാജ്യത്തിന്റെ ശബ്​ദമാവുകയാണ്​ കോൺഗ്രസി​ന്റെ ദൗത്യമെന്ന്​ അധ്യക്ഷൻ രാഹുൽ ഗാന്ധി. പാർട്ടി അധ്യക്ഷനായ ശേഷമുള്ള  ആദ്യ പ്രവർത്തക സമിതി യോ​ഗത്തിൽ സംസാരിക്കു​കയായിരുന്നു അദ്ദേഹം. ബിജെപി ദലിതരെയും ആദിവാസികളെയും ന്യൂനപക്ഷങ്ങളെയും ആക്രമിക്കുമ്പോൾ, രാജ്യത്തിന്റെ ശബ്ദമാകുകയാണ് കോൺ​ഗ്രസിന്റെ ദൗത്യം. ഇന്ത്യയിൽ അടിച്ചമർത്തപ്പെട്ടവർക്കായാണ്​ കോൺഗ്രസ്​ സംസാരിക്കേണ്ടതെന്നും രാഹുൽ പറഞ്ഞു. 

പുതുതായി രൂപീകരിച്ച പ്രവർത്തകസമിതി പരിചയ സമ്പത്തിന്റെയും ഊർജ്ജത്തിന്റെയും കേന്ദ്രമാണ്. കോൺ​ഗ്രസ് പ്രവർത്തകർ അടിച്ചമർത്തപ്പെട്ടവർക്കായി പോരാടണമെന്നും രാഹുൽ ​ഗാന്ധി ആവശ്യപ്പെട്ടു. നയരൂപീകരണത്തിന് പകരമാകില്ല, ആത്മപ്രശംസയും പാഴ്വാ​ഗ്ദാനങ്ങളുമെന്ന്, നരേന്ദ്രമോദിക്കെതിരെ രൂക്ഷ വിമർശനം ഉന്നയിച്ചുകൊണ്ട് മുൻപ്രധാനമന്ത്രി മൻമോഹൻ സിം​ഗ് അഭിപ്രായപ്പെട്ടു. 

ആര്‍എസ്എസിനെ നേരിടാന്‍ സഖ്യം അനിവാര്യമാണെന്ന് യുപിഎ ചെയർപേഴ്സൺ സോണിയ ഗാന്ധി അഭിപ്രായപ്പെട്ടു. ആര്‍എസ്എസിന്റെ സാമ്പത്തിക-സംഘടന ശക്തികളെ മറികടക്കുന്നതിന് തന്ത്രപരമായ സഖ്യമാണ് ആവശ്യമായിരിക്കുന്നത്. വ്യക്തി താത്പര്യങ്ങള്‍ മാറ്റി വച്ചുകൊണ്ട് നേതാക്കള്‍ ഇതിന് തയ്യാറാവണമെന്നും സോണിയ ഗാന്ധി ആവശ്യപ്പെട്ടു. പ്രവർത്തകസമിതിയിൽ 23 സ്ഥിരം അംഗങ്ങളാണ്​ ഉള്ളത്​. 19 സ്ഥിരം ക്ഷണിതാക്കളും ഒമ്പത്​ പ്രത്യേക ക്ഷണിതാക്കളും പ്രവർത്തകസമിതിയിലുണ്ട്​​​.