ഒരു കാലത്ത് ബിജെപിയുടെ അവസാന വാക്കായിരുന്നു അദ്വാനി. എന്നാല്‍ നരേന്ദ്ര മോദിയും അമിത് ഷായും ശക്തികേന്ദ്രമായതോടെ അദ്വാനിക്ക് വേണ്ട പരിഗണന ലഭിക്കുന്നില്ലെന്ന് ഒരു ആരോപണമുണ്ട്. ഇന്നലെ തൃപുരയിലെ സത്യപ്രതിജ്ഞ ചടങ്ങ് അത്തരത്തിലുള്ള ഒരു രംഗത്തിനും സാക്ഷിയായി. മോദിക്കുമുന്നില്‍ കൈകൂപ്പി നിന്നിട്ടും രാഷ്ട്രീയ ഗുരുവിനെ കണ്ടതായി ഭാവിക്കാതെ മോദി പോയതാണ് വിവാദമായിരിക്കുന്നത്.
അദ്വാനിയെ മോദി അപമാനിച്ചെന്ന് ആരോപിച്ച് നിരവധി പേരാണ് രംഗത്തെത്തിയത്. ഇതിന്റെ വീഡിയോ സോഷ്യല്‍ മീഡിയയില്‍ വൈറലാവുകയാണ്. തൃപുരയില്‍ ബിജെപി സര്‍ക്കാര്‍ അധികാരമേല്‍ക്കുന്നത് കാണാന്‍ പാര്‍ട്ടിയിലെ പ്രമുഖ നേതാക്കളെല്ലാം എത്തിയിരുന്നു. അദ്വാനി ഉള്‍പ്പടെയുള്ളവര്‍ വേദിയില്‍ ഇരിക്കുമ്പോഴാണ് മോദി കടന്നുവന്നത്.
വേദിയിലുണ്ടായിരുന്നവര്‍ എഴുന്നേറ്റു നിന്നാണ് മോദിയെ സ്വീകരിച്ചത്. എല്‍.കെ അദ്വാനി എഴുന്നേറ്റു നിന്ന് കൈകൂപ്പി. എന്നാല്‍ തന്റെ രാഷ്ട്രീയ ഗുരുവിനെ വകവെക്കാതെ അദ്ദേഹം കടന്നുപോകുന്നതാണ് ദൃശ്യങ്ങളിലുള്ളത്. അദ്വാനിയുടെ സമീപത്ത് നിന്നിരുന്ന മുന്‍ തൃപുര മുഖ്യമന്ത്രി മാണിക് സര്‍ക്കാരിനോട് സംസാരിക്കുന്നതും കാണാം. രാഷ്ട്രീയ ഗുരുവിന് ശിക്ഷ്യന്റെ ദക്ഷിണ എന്ന അടിക്കുറുപ്പോടെയാണ് വീഡിയോ പ്രചരിക്കുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
