കൊല്‍ക്കത്ത: വെള്ളക്കുതിരപ്പുറത്ത് വാളോങ്ങിയിരിക്കുന്ന ഹീറോയാണ് പ്രധാനമന്ത്രി നരേന്ദ്രമോദിയെന്ന് ശശി തരൂരിന്റെ പരിഹാസം. മോദിയുടെ ഒറ്റയാള്‍ സര്‍ക്കാരാണ് രാജ്യത്ത് എല്ലാം തീരുമാനിക്കുന്നത്. മോദി പറയുന്നതിനനുസരിച്ച് മറ്റെല്ലാവരും നൃത്തം ചവിട്ടുകയാണെന്നും അദ്ദേഹം തുറന്നടിച്ചു. ഇന്ത്യയുടെ ചരിത്രത്തിലെ തന്നെ ഏറ്റവും കേന്ദ്രീകൃതനായ പ്രധാനമന്ത്രിയാണ് നരേന്ദ്രമോദിയെന്നും തരൂര്‍ പറഞ്ഞു.
എല്ലാ തീരുമാനവും മോദിയാണ് കൈക്കൊള്ളുന്നത്. എല്ലാ ഫയലും പ്രധാനമന്ത്രിയുടെ ഓഫീസിന്റെ അനുമതി കാത്താണ് ഇരിക്കുന്നത്. രാജ്യത്തെ സാധാരണക്കാരന്‍ ഇതിന്റെ ഫലം അനുഭവിക്കുകയാണെന്നും അദ്ദേഹം പറഞ്ഞു.
കഴിഞ്ഞയാഴ്ച 'ശിവലിംഗത്തിന് മേലിരിക്കുന്ന തേളി'നോട് പ്രധാനമന്ത്രിയെ ആര്‍എസ്എസ് നേതാവ് വിശേഷിപ്പിച്ചുവെന്ന തരൂരിന്റെ പ്രസ്താവന വളരെ വിവാദമായിരുന്നു. ഡല്‍ഹി ഹൈക്കോടതിയില്‍ തരൂരിനെതിരെ മാനനഷ്ടക്കേസും ഫയല്‍ ചെയ്യപ്പെട്ടിരുന്നു.
തിരഞ്ഞെടുപ്പിന് മുമ്പും ശേഷവും മറ്റു പാര്‍ട്ടികളുമായി കോണ്‍ഗ്രസ് സഖ്യമുണ്ടാക്കുമെന്നും രാഹുല്‍ ഗാന്ധി പ്രധാനമന്ത്രിയെ പ്രധാനമന്ത്രി സ്ഥാനാര്‍ത്ഥിയായി ഉയര്‍ത്തിക്കാട്ടിയേക്കില്ലെന്നും തരൂര്‍ പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
