മുംബൈ: മുംബൈയിലെ പ്രമുഖ ബില്‍ഡേഴ്‌സിനെതിരെ പരാതിയുമായി ആളുകള്‍ രംഗത്ത്. ഒരു ഫ്‌ലാറ്റ് ഇവര്‍ നിരവധി ആളുകള്‍ക്കാണ് ബുക്ക് ചെയ്തത്. ലക്ഷങ്ങളുടെ തട്ടിപ്പു കേസില്‍ ഇരയായവരില്‍ ഗായിക അനുരാധ പൊതുവാളും ഉള്‍പ്പെട്ടിട്ടുണ്ട്. മുംബൈയിലെ ഏഴ് പ്രമുഖ ബില്‍ഡേഴ്‌സ് ചേര്‍ന്നാണ് തട്ടിപ്പ് നടത്തിയത്. സംഭവം വിവാദമായതോടെ ഇവര്‍ ഏഴ് പേരും ഒളിവില്‍ പോയി.
അര്‍ണാല ബീച്ചിന് സമീപം വളരെ കുറഞ്ഞ വിലയില്‍ ഫ്‌ലാറ്റ് ലഭ്യമാണെന്ന് പറഞ്ഞാണ് ഇവര്‍ അനുരാധ ഉള്‍പ്പെടെയുള്ള ഇടപാടുകാരെ ചതിയില്‍ വീഴ്ത്തിയത്. എന്നാല്‍ ഇടപാടുകാര്‍ ആരും തന്നെ ഒരു ഫ്‌ലാറ്റ് ആണ് എല്ലാവരും ബുക്ക് ചെയ്തത് എന്ന് ആദ്യ ഘട്ടത്തില്‍ അറിയുന്നുണ്ടായിരുന്നില്ല.
കോടികള്‍ വിലമതിക്കുന്ന ആഢംബര ഫ്‌ലാറ്റ് ആയിരുന്നു കുറഞ്ഞ വിലയ്ക്ക് ഇവര്‍ വില്‍ക്കാനൊരുങ്ങിയത്. നീന്തല്‍ക്കുളം, ജിം, പാര്‍ക്ക് തുടങ്ങിയ സൗകര്യങ്ങളെല്ലാം ഇവര്‍ വാഗ്ദാനം നല്‍കിയിരുന്നു. '2013ലാണ് ഞാന്‍ രണ്ട് ഫ്‌ലാറ്റുകള്‍ ബുക്ക് ചയ്തത്. പക്ഷേ, ബില്‍ഡേഴ്‌സ് എന്നെ ചതിക്കുകയാണുണ്ടായത്. ചതിക്കപ്പെട്ടെന്ന് മനസിലായപ്പോള്‍ തന്നെ ഞാന്‍ അര്‍ണല പൊലീസില്‍ പരാതി നല്‍കി. അന്നു മുതല്‍ പൊലീസിന്റെ ഭാഗത്തു നിന്ന് നല്ല സഹകരണമുണ്ട്' അനുരാധ പൊതുവാള്‍ വ്യക്തമാക്കി.
ബില്‍ഡേഴിസിനെതിരെ പൊലീസ് വഞ്ചനാക്കുറ്റം ചുമത്തി കേസെടുത്തിട്ടുണ്ട്. പ്രതികള്‍ എല്ലാവരും ഒളിവിലാണ്. ഇതില്‍ രണ്ട് പേരെ പൊലീസ് തിരിച്ചറിഞ്ഞിട്ടുണ്ട്. ഇവരെ കണ്ടെത്തിയാല്‍ ഉടന്‍ കേസെടുക്കുമെന്ന് പൊലീസ് അറിയിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
