ന്യൂഡല്ഹി: ബലാത്സംഗക്കേസുകളില് പ്രതികള്ക്ക് അനുകൂലമായി മൊഴി മാറ്റുന്ന പരാതിക്കാരെ ശിക്ഷിക്കാമെന്ന് സുപ്രീംകോടതി. പരാതിക്കാരി മൊഴി മാറ്റിയാലും മെഡിക്കല് റിപ്പോര്ട്ട് ഉള്പ്പെടെയുള്ള മറ്റ് തെളിവുകള് അടിസ്ഥാനമാക്കി പ്രതികളെ ശിക്ഷിക്കണമെന്നും ജസ്റ്റിസ് രഞ്ജന് ഗൊഗോയ് അധ്യക്ഷനായ ബെഞ്ച് ഉത്തരവിട്ടു.
പരാതിക്കാരി മൊഴിമാറ്റിയാലും കേസ് അവസാനിപ്പിക്കരുത്. ക്രിമിനല് വിചാരണകള് സത്യം തേടിയുള്ള അന്വേഷണമാണെന്നും കോടതി നിരീക്ഷിച്ചു.
മൊഴിമാറ്റി അതീവ ഗൗരവതരമായ കേസുകളെ അട്ടിമറിക്കുന്നത് കോടതിക്ക് നോക്കിനില്ക്കാനാവില്ല. സത്യം പുറത്ത് കൊണ്ടുവരാന് എല്ലാ പരിശ്രമങ്ങളും വേണമെന്നും കോടതി പറഞ്ഞു. ബലാത്സംഗക്കേസിലെ പരാതിക്കാരി മൊഴിമാറ്റിയിട്ടും പ്രതിയെ ശിക്ഷിച്ച ഗുജറാത്ത് ഹൈക്കോടതി ഉത്തരവ് സുപ്രീം കോടതി ശരിവെച്ചു.
അതേസമയം 2004ല് പെണ്കുട്ടിക്ക് ഒന്പത് വയസുള്ളപ്പോള് നടന്ന സംഭവമായതിനാലും നിലവില് കുടുംബമായി ജീവിക്കുന്ന സാഹചര്യവും കണക്കിലെടുത്ത് മൊഴിമാറ്റിയതിന് .പരാതിക്കാരിക്കെതിരെ കേസെടുക്കിന്നില്ലെന്നും കോടതി വ്യക്തമാക്കി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ