ന്യൂഡല്‍ഹി: ഇന്ന് അര്‍ധരാത്രി മുതല്‍ വിമാനം പറത്തില്ലെന്ന് ജെറ്റ് എയര്‍വേസ് പൈലറ്റുമാര്‍. ശമ്പളക്കുടിശ്ശിക പരിഹരിക്കാത്തതിനെ തുടര്‍ന്നാണ് പണിമുടക്കിലേക്ക് നീങ്ങുന്നത്. ആയിരത്തോളം പൈലറ്റുമാരും എഞ്ചിനീയര്‍മാരുമാണ് പണിമുടക്കുന്നത്. നാളെ രാവിലെയോടെ ഇത് സംബന്ധിച്ച് ഔദ്യോഗിക പ്രഖ്യാപനം ഉണ്ടായേക്കും.
കടക്കെണിയില്‍ ആയതിനെ തുടര്‍ന്ന് അന്താരാഷ്ട്ര സര്‍വീസുകള്‍ പലതും കഴിഞ്ഞ ഒരാഴ്ചയായി ജെറ്റ് എയര്‍വേസ് നിര്‍ത്തി വച്ചിരിക്കുകയായിരുന്നു. മാസങ്ങളായി ശമ്പളം മുടങ്ങിയിട്ടും കമ്പനിയുടെ പ്രവര്‍ത്തനം നിലയ്ക്കാതിരിക്കുന്നതിനായാണ് ജോലിക്ക് വന്നിരുന്നതെന്നും ഇനി അത് തുടരാന്‍ സാധ്യമല്ലെന്നും നാഷണല്‍ ഏവിയേറ്റേഴ്‌സ് ഗില്‍ഡ് തലവന്‍ കരണ്‍ ചോപ്ര വ്യക്തമാക്കി.
1500 കോടി രൂപ എസ്ബിഐയില്‍ നിന്ന് ലഭിക്കുമ്പോള്‍ ശമ്പളക്കുടിശ്ശിക തീര്‍ക്കാമെന്നായിരുന്നു പൈലറ്റുമാര്‍ക്ക് നല്‍കിയ വാഗ്ദാനം. എന്നാല്‍ ഇത് പാലിക്കുകയുണ്ടായില്ല.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
