മോദിക്കും യോഗിക്കും ഒപ്പം സ്വാതന്ത്ര്യദിനാശംസകള് നേര്ന്ന് ഉന്നാവോ ബലാത്സംഗക്കേസ് പ്രതിയായ എംഎല്എ; പത്രപരസ്യം വിവാദത്തില്
ലഖ്നൗ: പ്രധാനമന്ത്രി നരേന്ദ്ര മോദിക്കും യുപി മുഖ്യമന്ത്രി യോഗി ആദിത്യനാഥിനും ഒപ്പം ഉന്നാവോ ബലാത്സംഗക്കേസ് പ്രതിയായ ബിജെപി എംഎല്എ കുല്ദീപ് സിങ് സെന്ഗാറിന്റെ ചിത്രംവെച്ച് സ്വാതന്ത്ര്യ ദിന പരസ്യം. ഒരു ഹിന്ദി പത്രത്തിന്റെ പ്രാദേശിക എഡിഷനിലാണ് പരസ്യം നല്കിയിരിക്കുന്നത്.
സ്വാതന്ത്ര്യദിനത്തിനും രക്ഷാബന്ധനും ആശംസകള് നേര്ന്നാണ് പരസ്യം നല്കിയിരിക്കുന്നത്. സില പഞ്ചായത്ത് ചെയര്പേഴ്സണായ സെന്ഗാറിന്റെ ഭാര്യയുടെ ചിത്രവും പരസ്യത്തിലുണ്ട്. ഉഗു പഞ്ചായത്ത് ചെയര് പേഴ്സണ് അഞ്ജുകുമാര് ദീക്ഷിത്താണ് പരസ്യം നല്കിയിരിക്കുന്നത്.
തങ്ങളുടെ പ്രദേശത്തെ എംഎല്എ ആയതുകൊണ്ടാണ് സെന്ഗാറിന്റെ ചിത്രം പരസ്യത്തില് നല്കിയത് എന്നാണ് ദീക്ഷിത്തിന്റെ വിശദീകരണം. സെന്ഗാര് ഞങ്ങളുടെ എംഎല്എയായി തുടരുന്നതുവരെ അദ്ദേഹത്തിന്റെ ചിത്രം ഉപയോഗിക്കാം. ഞാന് ഒരു രാഷ്ട്രീയപ്പാര്ട്ടിയിലെയും അംഗമല്ല, അവരെന്ത് പറയുന്നത് എന്നത് എന്റെ വിഷയമല്ല. ഞാന് ഒരു പാര്ട്ടിയേയും പരസ്യത്തില് പേരെടുത്ത് പറഞ്ഞിട്ടില്ല- ദീക്ഷിത് പറഞ്ഞു.
ഉന്നാവോ ബലാത്സംഗക്കേസ് ഇരയെ വാഹനമിടിച്ചു കൊല്ലാന് ശ്രമിച്ച കേസിലും സെന്ഗാര് പ്രതിയാണ്. സെന്ഗാറിന് എതിരെ കൊലക്കുറ്റത്തിന് കേസെടുത്തതിന് പിന്നാലെ എംഎല്എയെ ബിജെപി സസ്പെന്റ് ചെയ്തിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ