ന്യൂഡൽഹി: ഐഎൻഎക്സ് മീഡിയ കേസിൽ മുൻ കേന്ദ്രമന്ത്രി പി.ചിദംബരം ഉടൻ അറസ്റ്റിലായേക്കും. സിബിഐ ലുക്കൗട്ട് നോട്ടീസ് പുറപ്പെടുവിച്ച ചിദംബരം എഐസിസി ആസ്ഥാനത്തെത്തിയതിനു പിന്നാലെയാണ് സിബിഐ സംഘം അറസ്റ്റിനുള്ള നീക്കങ്ങൾ ആരംഭിച്ചത്. രാജ്യതലസ്ഥാനത്ത് അത്യന്തം നാടകീയ നീക്കങ്ങളാണ് ഇപ്പോൾ അരങ്ങേറുന്നത്.
ചിദംബരത്തിന്റെ ജോർബാഗിലെ വസതിയിലെത്തിയ സിബിഐ സംഘം മതിൽ ചാടിക്കടന്ന് അകത്തുകടന്നു. കൂടുതൽ സിബിഐ ഉദ്യോഗസ്ഥർ ഇവിടേക്ക് എത്തിക്കൊണ്ടിരിക്കുകയാണ്.
പാർട്ടി ആസ്ഥാനത്തെത്തിയ ചിദംബരം നേതാക്കൾ‌ക്കൊപ്പം വാർത്താ സമ്മേളനത്തിൽ പങ്കെടുത്തശേഷമാണ് ജോർബാഗിലെ വസതിയിലേക്ക് പോയത്. സിബിഐ സംഘം എത്തുന്നുണ്ടെന്ന് വിവരം ലഭിച്ചതിന്റെ അടിസ്ഥാനത്തിലാണ് അദ്ദേഹം എഐസിസി ആസ്ഥാനത്തുനിന്ന് പെട്ടെന്ന് മടങ്ങിയത്.
ചിദംബരവും അഭിഭാഷകരും അടങ്ങുന്ന സംഘം വസതിയിലേക്ക് കടന്നതിനു പിന്നാലെ സെക്യൂരിറ്റി ഉദ്യോഗസ്ഥർ ഗേറ്റ് അടച്ചു. സിബിഐ ആവശ്യപ്പെട്ടെങ്കിലും ഗേറ്റ് തുറക്കാതിരുന്നതിനാൽ ഗേറ്റ് ചാടിക്കടക്കുകയായിരുന്നു ഉദ്യോഗസ്ഥർ.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
