ഭീകര സംഘടനയായ തെഹ്‌രീക്- അല്‍- മുജാഹിദിനെ കേന്ദ്രസര്‍ക്കാര്‍ നിരോധിച്ചു
By സമകാലികമലയാളം ഡെസ്‌ക്‌ | Published: 06th February 2019 02:14 PM |
Last Updated: 06th February 2019 02:15 PM | A+A A- |
പ്രതീകാത്മക ചിത്രം
ന്യൂഡല്‍ഹി: കശ്മീര്‍ കേന്ദ്രമായി പ്രവര്‍ത്തിക്കുന്ന ഭീകര സംഘടനയായ തെഹ്‌രീക്- അല്‍- മുജാഹിദിനെ കേന്ദ്രസര്‍ക്കാര്‍ നിരോധിച്ചു. കശ്മീരില്‍ സ്വതന്ത്രവാദത്തെ പ്രോത്സാഹിപ്പിക്കുന്ന സംഘടന, നിരവധി ഭീകര പ്രവര്‍ത്തനങ്ങളില്‍ ഭാഗമായതായി കണ്ടെത്തിയതിന്റെ അടിസ്ഥാനത്തിലാണ് നടപടി.
രാജ്യത്ത് നടന്ന നിരവധി ഭീകര പ്രവര്‍ത്തനങ്ങളില്‍ തെഹ്‌രീക്- അല്‍- മുജാഹിദിന് പങ്കുളളതായി സംഘടനയെ നിരോധിച്ചുകൊണ്ടുളള ആഭ്യന്തരമന്ത്രാലയത്തിന്റെ ഉത്തരവില്‍ വ്യക്തമാക്കുന്നു.വിദേശത്ത് കഴിയുന്ന സംഘടനയോട് ആഭിമുഖ്യമുളളവരില്‍ നിന്ന് സാമ്പത്തികം ഉള്‍പ്പെടെയുളള സഹായങ്ങള്‍ തെഹ്‌രീക് - അല്‍- മുജാഹിദ് പ്രവര്‍ത്തകര്‍ക്ക് ലഭിക്കുന്നതായും കേന്ദ്രസര്‍ക്കാര്‍ കണ്ടെത്തിയിട്ടുണ്ട്.
1990ലാണ് ഈ സംഘടന നിലവില്‍ വന്നത്. കശ്മീരിനെ സ്വതന്ത്രമാക്കുക എന്ന ലക്ഷ്യത്തെ മുന്‍നിര്‍ത്തിയാണ് സംഘടനയ്ക്ക് രൂപം നല്‍കിയത്. ഇതിന്റെ അടിസ്ഥാനത്തിലുളള ഭീകര പ്രവര്‍ത്തനങ്ങളുമായി സംഘടന സജീവമാണെന്നും കേന്ദ്രസര്‍ക്കാര്‍ വ്യക്തമാക്കി.
