ബംഗലൂരു: സ്വര്ണാഭരണങ്ങളും മൊബൈല് ഫോണും മോഷ്ടിച്ച വീട്ടുജോലിക്കാരിയെ അതിവിദഗ്ധമായി പിടികൂടി. മോഷ്ടിച്ച മൊബൈല് ഫോണിലെ ഫെയ്സ്ബുക്ക് അക്കൗണ്ടിന്റെ പ്രൊഫൈല് ചിത്രം മാറ്റിയതാണ് വീട്ടുജോലിക്കാരിയെ പിടികൂടാന് പൊലീസിനെ സഹായിച്ചത്.
ബംഗലുരൂവിലാണ് സംഭവം. 31 വയസുകാരിയായ അശ്വനി വീട്ടുജോലിക്ക് നിന്ന ഗിരിനഗറിലെ വീട്ടില് നിന്നാണ് 100 ഗ്രാം സ്വര്ണവും മൊബൈല് ഫോണും മോഷ്ടിച്ചത്. മൊബൈല് ഫോണില് തന്റെ ഫെയസ്ബുക്ക് അക്കൗണ്ടിന്റെ പ്രൊഫൈല് ചിത്രം മാറ്റിയതായി വീട്ടുടമയുടെ മകളുടെ ശ്രദ്ധയില്പ്പെട്ടതാണ് പ്രതിയെ പിടികൂടുന്നതില് വഴിത്തിരിവായത്. പകരം അശ്വനിയുടെ അഞ്ചുവയസുളള മകളുടെ ചിത്രമാണ് പ്രൊഫൈല് ചിത്രമായി നല്കിയിരുന്നത്.
ഇതില് സംശയം തോന്നിയ വീട്ടുടമ അശ്വിനിയോട് കാര്യങ്ങള് ചോദിച്ചു. എന്നാല് ഒന്നും അറിയില്ല എന്നാല് ഇവര് മറുപടി നല്കിയത്. തുടര്ന്ന് പൊലീസില് കുടുംബം പരാതി നല്കുകയായിരുന്നു. ഇവരുടെ ചോദ്യം ചെയ്യലിലും പ്രതി മോഷണം നടത്തിയിട്ടില്ലെന്ന് തറപ്പിച്ചുപറഞ്ഞു. തുടര്ന്ന് അവരുടെ വീട്ടില് നടത്തിയ പരിശോധനയില് സ്വര്ണാഭരണങ്ങള് വിറ്റതിന്റെ തെളിവ് ലഭിക്കുകയായിരുന്നു. സ്വര്ണാഭരണങ്ങള് വിറ്റതിന്റെ രസീതാണ് മോഷ്ടാവിനെ പിടികൂടാന് പൊലീസിനെ സഹായിച്ചത്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ