ന്യൂഡല്‍ഹി: ലോക്‌സഭ തെരഞ്ഞെടുപ്പ് പ്രചാരണവേളയില്‍ ബിജെപി സ്ഥാനാര്‍ത്ഥിയായിരുന്ന നടി ഹേമമാലിനിയുടെ പല പ്രവൃത്തികളും വാര്‍ത്തകളില്‍ ഇടംപിടിച്ചിരുന്നു. അരിവാളുമായി പാടത്ത് ഇറങ്ങി കൊയ്യാന്‍ കൂട്ടുനില്‍ക്കുന്നത് മുതല്‍ മഥുരയില്‍ സ്ഥാനാര്‍ത്ഥിയായിരുന്ന സമയത്ത് പ്രചാരണം കൊഴുപ്പിക്കാന്‍ ഹേമമാലിനി നടത്തിയ പല പരിശ്രമങ്ങളും ട്രോളുകളായി മാറുന്നതാണ് പിന്നീട് കണ്ടത്. ഇപ്പോള്‍ വീണ്ടും പരിഹാസത്തിന് വിധേയയാരിക്കുകയാണ് നടി.
സ്വച്ഛ് ഭാരത് അഭിയാന്റെ ഭാഗമായി പാര്‍ലമെന്റ് പരിസരത്ത് നടന്ന ശുചീകരണ ജോലിയാണ് ഹേമമാലിനിയെ വീണ്ടും വാര്‍ത്തകളില്‍ ഇടം നേടികൊടുത്തിരിക്കുന്നത്. ഇതിന്റെ വീഡിയോ ഇപ്പോള്‍ വ്യാപകമായാണ് പ്രചരിക്കുന്നത്.
കേന്ദ്ര ധനകാര്യ സഹമന്ത്രി അനുരാഗ് താക്കൂറിനൊടൊപ്പം ചൂല് ഉപയോഗിച്ച് പാര്‍ലമെന്റ് പരിസരം വൃത്തിയാക്കുന്നതാണ് ദൃശ്യങ്ങളിലുളളത്. എന്നാല്‍ ഹേമമാലിനി ചൂല് പിടിച്ച രീതിയും ചെയ്യുന്ന പ്രവൃത്തിയുമാണ് സോഷ്യല്‍മീഡയില്‍ പരിഹാസത്തിന് ഇടയാക്കിയിരിക്കുന്നത്. അനുരാഗ് താക്കൂര്‍ ജോലിയില്‍ ആത്മാര്‍ത്ഥതയോടെ ഇടപെടുമ്പോള്‍, പ്രതീകാത്മകമായി ചൂല് പിടിച്ചിരിക്കുന്ന രീതിയിലാണ് ഹേമമാലിനിയെ ദൃശ്യങ്ങളില്‍ കാണുന്നത്.
ഈ ദൃശ്യങ്ങള്‍ക്ക് ചുവടെ നിരവധി കമന്റുകളാണ് പ്രത്യക്ഷപ്പെട്ടത്. അനുരാഗ് താക്കൂര്‍ ഹേമമാലിനിയെക്കാള്‍ നന്നായി അഭിനയിക്കുന്നുണ്ട് എന്നിങ്ങനെ തുടങ്ങി നിരവധി ട്രോളുകളാണ് കമന്റുകളായി പ്രവഹിക്കുന്നത്. പാര്‍ലമെന്റ് ഇതിനോടകം തന്നെ വൃത്തിയായി കിടക്കുന്ന സ്ഥലമാണെന്ന് പറഞ്ഞ് ഇവിടെയല്ല വൃത്തിയാക്കേണ്ടത് എന്ന് ഇവരെ ഓര്‍മ്മിപ്പിക്കാനും ചിലര്‍ ശ്രമിക്കുന്നുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
