ന്യൂഡൽഹി: സിപിഐ, തൃണമൂൽ കോൺഗ്രസ്, നാഷണലിസ്റ്റ് കോൺഗ്രസ് പാർട്ടി എന്നിവയുടെ ദേശീയ പാർട്ടി പദവി നഷ്ടമായേക്കുമെന്ന് റിപ്പോർട്ട്. ദേശീയ പാർട്ടി പദവി നിലനിർത്തുന്നതിന് കാരണം ബോധിപ്പിക്കാൻ തെരഞ്ഞടുപ്പ് കമീഷൻ പാർട്ടികൾക്ക് നോട്ടീസ് അയച്ചു. ആഗസ്റ്റ് അഞ്ചിനകം മറുപടി നൽകണമെന്നാണ് നിർദേശം.
ദേശീയ പാർട്ടി പദവിക്ക് തെരഞ്ഞടുപ്പ് കമീഷൻ മാനദണ്ഡപ്രകാരം മൂന്നു സംസ്ഥാനങ്ങളിൽ നിന്നും രണ്ടു ശതമാനം ലോക്സഭ സീറ്റുകളിൽ വിജയം, ലോക്സഭ തെരഞ്ഞെടുപ്പിലോ സംസ്ഥാന തെരഞ്ഞെടുപ്പിലോ നാലു സംസ്ഥാനങ്ങളിലെങ്കിലും കുറഞ്ഞത് ആറു ശതമാനം വോട്ടും നാലു ലോക്സഭ സീറ്റുകളിൽ വിജയവും, നാലു സംസ്ഥാനങ്ങളിൽ സംസ്ഥാന പാർട്ടി പദവി ഇവയിൽ ഏതെങ്കിലും ഒന്നു വേണം.
ഇതിൽ മൂന്നാമത്തെ മാനദണ്ഡം അനുസരിച്ചായിരുന്നു സിപിഐക്ക് ദേശീയ പാർട്ടി പദവിയിൽ പിടിച്ചു നിൽക്കാനായത്. നിലവിൽ, ബിജെപി, കോൺഗ്രസ്, സിപിഎം, ബിഎസ്പി, എൻപിപി. തൃണമൂൽ കോൺഗ്രസ്, സിപിഐ, എൻസിപി എന്നിവർക്കാണ് ദേശീയ പാർട്ടി പദവിയുള്ളത്. ഇതിൽ, മേഘാലയ മുഖ്യമന്ത്രി കോൺറാഡ് കെ സാങ്മയുടെ എൻപിപിക്ക് തെരഞ്ഞെടുപ്പ് കമീഷൻ അടുത്തിടെയാണ് ദേശീയ പാര്‍ട്ടി പദവി നല്‍കിയത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
