ന്യൂഡൽഹി: രാജസ്ഥാൻ ബിജെപി അധ്യക്ഷനും രാജ്യസഭാ എംപിയുമായ മദൻലാൽ സെയ്നി അന്തരിച്ചു.75 വയസ്സായിരുന്നു. ഡൽഹിയിലെ എയിംസ് ആശുപത്രിയിലായിരുന്നു അന്ത്യം.
ശ്വാസകോശസംബന്ധമായ അസുഖത്തെ തുടർന്ന് ജയ്പൂരിലെ സ്വകാര്യ ആശുപത്രിയിൽ ചികിത്സയിലായിരുന്നു. നില വഷളായതിനെ തുടർന്ന് വിദഗ്ധ ചികിത്സയ്ക്കായി ശനിയാഴ്ച ഡൽഹിയിലെ എയിംസിലേക്ക് സെയ്നിയെ കൊണ്ടുവരികയായിരുന്നു.
കഴിഞ്ഞ വർഷം ജൂണിലാണ് സെയ്നി സംസ്ഥാന ബിജെപി അധ്യക്ഷനായി നിയമിതനായത്. സജീവ ആർഎസ്എസ് പ്രവർത്തകനായിരുന്ന സെയ്നി ഭാരതീയ കിസാൻ മോർച്ചയിലൂടെയാണ് വളരുന്നതും എംഎൽഎ ആകുന്നതും. വെള്ളിയാഴ്ച രാജസ്ഥാൻ മുൻ മുഖ്യമന്ത്രി വസുന്ധര രാജെ സെയ്നിയെ ആശുപത്രിയിൽ സന്ദർശിച്ചിരുന്നു. ബിജെപി നേതാവിന്‍റെ നിര്യാണത്തിൽ പ്രധാനമന്ത്രി നരേന്ദ്രമോദി ഉൾപ്പെടെ നിരവധി പ്രമുഖർ അനുശോചിച്ചു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
