മുംബൈ : ട്രെയിന്‍ യാത്രക്കിടെ ടിക്കറ്റ് എക്‌സാമിനര്‍ അപമര്യാദയായി പെരുമാറിയെന്ന് യുവതിയുടെ പരാതി. യുവതിയുടെ മുന്നിലെത്തിയ ട്രാവലിംഗ് ടിക്കറ്റ് എക്‌സാമിനര്‍ (ടിടിഇ) പൊടുന്നനെ വസ്ത്രങ്ങളെല്ലാം അഴിച്ച് നഗ്നനാകുകയും, ലൈംഗികചേഷ്ടകളോടെ അപമര്യാദയായി പെരുമാറുകയായിരുന്നു എന്നുമാണ് പരാതി. യുവതിയുടെ പരാതിയില്‍ ടിടിഇക്കെതിരെ റെയില്‍വേ പൊലീസ് കേസെടുത്തു.
കഴിഞ്ഞദിവസം ചെന്നൈ ദാദര്‍ എക്‌സ്പ്രസിലായിരുന്നു സംഭവം. രോഗബാധിതനായി മുംബൈയില്‍ ആശുപത്രിയില്‍ കഴിയുന്ന പിതാവിനെ കാണാനായി പോകുകയായിരുന്നു യുവതി. ദാദര്‍ എക്‌സ്പ്രസിലെ എസ്-8 കോച്ചിലായിരുന്നു ചെന്നൈ സ്വദേശിയായ യുവതി സഞ്ചരിച്ചത്.
രാത്രി 2.15 ഓടെ ടിക്കറ്റ് എക്‌സാമിനര്‍ എച്ച് എസ് മീണ യുവതിയുടെ കോച്ചിലെത്തി. യുവതി ടിക്കറ്റും ഐഡി പ്രൂഫും കാണിച്ചു. ഇത് പരിശോധിച്ചശേഷം തിരികെപോയ ടിടിഇ, അല്‍പ്പസമയത്തിന് ശേഷം തിരികെയെത്തിയാണ് അപമര്യാദയായി പെരുമാറിയത്.
യുവതിയുടെ മുന്നിലെത്തിയ അദ്ദേഹം പെട്ടെന്ന് വസ്ത്രങ്ങള്‍ അഴിച്ച് ലൈംഗികചേഷ്ടകളോടെ പെരുമാറാന്‍ തുടങ്ങി. അമ്പരന്നുപോയ യുവതി ഉടന്‍ തന്നെ അന്ധേരിയിലുള്ള ബന്ധുവിനെ വിളിച്ച് വിവരം പറഞ്ഞു. അയാള്‍ അറിയിച്ചതിനെ തുടര്‍ന്ന് റെയില്‍വേ പൊലീസ് ഉടന്‍ തന്നെ കോച്ചിലെത്തിയെങ്കിലും, അതിനിടെ ടിടിഇ മുങ്ങി. ട്രെയിന്‍ മുഴുവന്‍ അരിച്ചു പെറുക്കിയെങ്കിലും ഇയാളെ കണ്ടെത്താനായില്ല. സെന്‍ട്രല്‍ റെയില്‍വേയ്ക്ക് കീഴിലുള്ള ഉദ്യോഗസ്ഥനാണ് ഇയാളെന്ന് അധികൃതര്‍ വ്യക്തമാക്കി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
