ഡൽഹി: റെയിൽവേ ടിക്കറ്റുകളിലും എയർ ഇന്ത്യയുടെ ബോർഡിംഗ് പാസുകളിലും പ്രധാനമന്ത്രി നരേന്ദ്രമോദിയുടെ ചിത്രം ഉൾപ്പെടുത്തിയ സംഭവത്തിൽ റെയിൽവേയ്ക്കും വ്യോമയാന മന്ത്രാലയത്തിനും തെരഞ്ഞെടുപ്പ് കമ്മീഷൻ കാരണം കാണിക്കൽ നോട്ടീസ് നൽകി. മോദിയുടെ ജീവിതകഥ പറയുന്ന സിനിമയ്ക്ക് നോട്ടീസ് നൽകിയതിന് പിന്നാലെയാണിത്.
മാതൃക പെരുമാറ്റച്ചട്ടം നിലവിൽ വന്നിട്ടും ടിക്കറ്റുകളിൽ ചിത്രങ്ങള്‍ ഉൾപ്പെടുത്തിയതിനാലാണ് കമ്മീഷൻ നടപടിയെടുത്തത്. ഇക്കാര്യത്തിൽ മൂന്നു ദിവസത്തിനകം മറുപടി നൽകാനാണ് കേന്ദ്ര തെരഞ്ഞെടുപ്പ് കമ്മീഷൻ ആവശ്യപ്പെട്ടിരിക്കുന്നത്. തൃണമൂൽ കോൺഗ്രസ് നൽകിയ പരാതിയിലാണ് തെരഞ്ഞെടുപ്പ് കമ്മീഷൻ കാരണം കാണിക്കൽ നോട്ടീസ് അയച്ചത്.
കേന്ദ്ര ഭവന, നഗര ദാരിദ്ര നിര്‍മാര്‍ജന മന്ത്രാലയത്തിന്‍റെ പരസ്യത്തിലാണ് മോദിയുടെ ചിത്രം ഉൾപ്പെടുത്തിയിരിക്കുന്നത്. ടിക്കറ്റുകൾ അച്ചടിക്കുന്നതും വിതരണം ചെയ്യുന്നതും നിർത്തലാക്കണമെന്നും തൃണമൂൽ പരാതിയിൽ ആവശ്യപ്പെട്ടിരുന്നു.
മാർച്ച് പത്തിന് കേന്ദ്ര തെരഞ്ഞെടുപ്പ് കമ്മീഷൻ തെരഞ്ഞെടുപ്പ് തീയതികൾ പ്രഖ്യാപിച്ചത്. ഇതിനുശേഷം നരേന്ദ്രമോദിയുടെ ചിത്രമുള്ള ഹോർഡിംഗുകൾ, പോസ്റ്റർ എന്നിവ പെട്രോൾ പമ്പുകളിൽ നിന്നും വിമാനത്താവളത്തിൽ നിന്നും തെരഞ്ഞെടുപ്പ് കമ്മീഷന്‍ ഇടപെട്ട് നീക്കം ചെയ്തിരുന്നു. കോണ്‍ഗ്രസായിരുന്നു ഇക്കാര്യം ചൂണ്ടിക്കാട്ടി കമ്മീഷനെ സമീപിച്ചത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
