ദിമാപുർ: വിവാഹവേദിയിൽ തോക്കുമായി ഫോട്ടോയ്ക്കു പോസ് ചെയ്ത് നവദമ്പതികൾ. നാഗാലാൻഡ് വിമതനേതാവ് ബൊഹോതോ കിബയുടെ മകനും വധുവുമാണ് അതിഥികൾ നോക്കിനിൽക്കെ തോക്കേന്തി ചിത്രമെടുത്തത്.
എകെ 56, എം16 എന്നീ തോക്കുകളാണ് ഇവരുടെ കൈയിലുണ്ടായിരുന്നത് എന്നാണു റിപ്പോർട്ടുകൾ. നാഗാലാൻഡിലെ ദിമാപൂരിൽ ശനിയാഴ്ചയായിരുന്നു ഇവരുടെ വിവാഹം. കൊമേഴ്സ്യൽ ഹബിൽ നടന്ന വിവാഹചടങ്ങുകളിൽ ഇരുകൂട്ടരുടെയും ബന്ധുക്കളും സുഹൃത്തുക്കളുമടക്കം നിരവധിപ്പേർ പങ്കെടുത്തു.
നാഷണൽ സോഷ്യലിസ്റ്റ് കൗണ്സിൽ ഓഫ് നാഗാലാൻഡ് യൂണിഫിക്കേഷന്റെ (എൻഎസ് സി എൻ-യു) 'ആഭ്യന്തര മന്ത്രി' യാണു ബൊഹോതോ കിബ. മുമ്പ് മാധ്യമപ്രവർത്തകർക്ക് നേരെ വധഭീഷണി മുഴക്കിയും കിബ വാർത്തകളിൽ നിറഞ്ഞിരുന്നു. സംഘടന നേതാക്കൾക്കു ചാർത്തി നൽകിയിട്ടുള്ള പദവികൾ 'സ്വയം പ്രഖ്യാപിതം' എന്നു വിശേഷിപ്പിച്ചതിനായിരുന്നു മാധ്യമപ്രവർത്തകർക്ക് നേരെയുള്ള ഭീഷണി.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ