ന്യൂഡല്ഹി: കേന്ദ്ര ആഭ്യന്തര മന്ത്രി അമിത് ഷായ്ക്ക് കോവിഡ് സ്ഥീരീകരിച്ചതിന് പിന്നാലെ ഉത്തര്പ്രദേശ് ബിജെപി അധ്യക്ഷന് സ്വതന്ത്രദേവ് സിങിന് കോവിഡ് സ്ഥിരീകരിച്ചു. താനുമായി സമ്പര്ക്കം പുലര്ത്തിയ ആളുകള് കോവിഡ് മാര്ഗനിര്ദേശങ്ങള് അനുസരിച്ച് നീരീക്ഷണത്തില് പോകണമെന്ന് അദ്ദേഹം അഭ്യര്ത്ഥിച്ചു.
ഡോക്ടറുടെ മാര്ഗനിര്ദേശം അനുസരിച്ച് വീട്ടിലാണ് ചികിത്സയില് തുടരുന്നത്. എല്ലാവരും വളരെ ശ്രദ്ധപുലര്ത്തണമെന്നും സര്ക്കാര് മാര്ഗനിര്ദേശങ്ങള് പാലിക്കണമെന്നും അദ്ദേഹം പറഞ്ഞു.
അതേസമയം കോവിഡ് സ്ഥീരീകരിച്ച കാര്യം അമിത് ഷാ ട്വിറ്ററിലൂടെ അറിയിക്കുകയായിരുന്നു. അദ്ദേഹത്തെ ഡല്ഹിയിലെ ആശുപത്രിയില് പ്രവേശിപ്പിച്ചു.
തന്റെ ആരോഗ്യനില തൃപ്തികരമാണെന്ന് അദ്ദേഹം ട്വിറ്ററില് കുറിച്ചു. ' രോഗലക്ഷണങ്ങള് പ്രകടിപ്പിച്ചതിനെ തുടര്ന്ന് ടെസറ്റ് നടത്തി. റിസള്ട്ട് പോസിറ്റീവ് ആണ്. എന്റെ ആരോഗ്യനില തൃപ്തികരമാണ്. എന്നാല് ഡോക്ടര്മാരുടെ നിര്ദേശപ്രകാരം, ആശുപത്രിയില് അഡ്മിറ്റ് ആവുകയാണ്. കഴിഞ്ഞ ദിവസങ്ങളില് ഞാനുമായി സമ്പര്ക്കത്തില് ഏര്പ്പെട്ട എല്ലാവരും നിരീക്ഷണത്തില് പോണം' അദ്ദേഹം ട്വിറ്ററില് കുറിച്ചു.
ജൂലായ് 18 ന് കോവിഡ് സ്ഥിരീകരിച്ച ഉത്തര്പ്രദേശ് ക്യാബിനറ്റ് മന്ത്രി കമല് റാണി വരുണ് ഇന്ന് മരിച്ചു. ലഖ്നൗവിലെ ആശുപത്രിയില് വെച്ചായിരുന്നു മരണം. യോഗി ആദിത്യനാഥ് മന്ത്രിസഭയിലെ ടെക്നിക്കല് വിദ്യാഭ്യാസ മന്ത്രിയാണ് കമല്റാണി. രാജ്യത്ത് കോവിഡ് ബാധിച്ച് മന്ത്രി മരിക്കുന്നത് ആദ്യമായാണ്.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ