തുണിയെന്ന് കരുതി പിടിച്ചുവലിച്ചു ; പുള്ളിപ്പുലിയെന്ന് അറിഞ്ഞപ്പോള്‍ പെണ്‍കുട്ടികള്‍ ഞെട്ടി ; വനിതാ ഹോസ്റ്റലില്‍ പരിഭ്രാന്തി

വനം വകുപ്പ് ഉദ്യോഗസ്ഥര്‍ എത്തി നാലു മണിക്കൂറോളം പരിശ്രമിച്ച ശേഷമാണ് പുലിയെ കൂട്ടിലാക്കാന്‍ കഴിഞ്ഞത്
പ്രതീകാത്മക ചിത്രം
പ്രതീകാത്മക ചിത്രം

ഗുവാഹത്തി : ലേഡീസ് ഹോസ്റ്റലില്‍ കയറിയ പുള്ളിപ്പുലി അന്തേവാസികളെ പരിഭ്രാന്തിയിലാഴ്ത്തി. അസമിലെ ഹംഗേരാബാരിയിലാണ് സംഭവം. ഹോസ്റ്റല്‍ മുറിയിലെ സോഫയ്ക്ക് അടിയില്‍ സുഖമായി ഉറങ്ങുകയായിരുന്നു അതിക്രമിച്ചു കടന്ന പുലി.

15 പെണ്‍കുട്ടികളാണ് ഹോസ്റ്റലില്‍ ഉണ്ടായിരുന്നത്. സോഫയ്ക്ക് അടിയില്‍ കിടന്ന പുലിയെ തുണിയെന്ന് തെറ്റിദ്ധരിച്ച് ഒരു പെണ്‍കുട്ടി പിടിച്ചതോടെയാണ് അതിക്രമിച്ചു കയറിയ 'ഭീകരനെ' തിരിച്ചറിയുന്നത്. 

ഭയന്ന പെണ്‍കുട്ടികള്‍ മുറിയില്‍ കയറി വാതിലടച്ചു. തുടര്‍ന്ന് വനംവകുപ്പ് ഉദ്യോഗസ്ഥരെ വിവരം അറിയിക്കുകയായിരുന്നു. വനം വകുപ്പ് ഉദ്യോഗസ്ഥര്‍ എത്തി നാലു മണിക്കൂറോളം പരിശ്രമിച്ച ശേഷമാണ് പുലിയെ കൂട്ടിലാക്കാന്‍ കഴിഞ്ഞത്. 

വനം വകുപ്പ് ഉദ്യോഗസ്ഥര്‍ മയക്കുവെടി വെച്ചതോടെ, പുലി അടുത്ത വീട്ടിലേക്ക് ഓടിക്കയറിയതും പരിഭ്രാന്തി ഇരട്ടിച്ചു. തുടര്‍ന്ന് വനംവകുപ്പ് അധികൃതര്‍ പുലിയെ കൂട്ടിലടയ്ക്കുകയായിരുന്നു.

പുലിയെ മൃഗശാലയിലേക്ക് മാറ്റി. പരിക്കുകള്‍ ഭേദമായ ശേഷം  പുലിയെ കാട്ടില്‍ വിടുമെന്ന് അസം വനംവകുപ്പ് ഉദ്യോഗസ്ഥര്‍ അറിയിച്ചു. 
 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ

Related Stories

No stories found.
logo
Samakalika Malayalam
www.samakalikamalayalam.com