ഹൈദരാബാദ്: ആന്ധ്രാപ്രദേശില് നിയന്ത്രണംവിട്ട കാര് കണ്ടെയ്നര് ട്രക്കില് ഇടിച്ചു കയറി പൊട്ടിത്തെറിച്ച് ബാങ്ക് ജീവനക്കാരന് ദാരുണാന്ത്യം. കാറില് ഒപ്പം ഉണ്ടായിരുന്ന മൂന്ന് പേര് അത്ഭുതകരമായി രക്ഷപ്പെട്ടു. ബാങ്ക് ജീവനക്കാരന് അംഗപരിമിതന് ആയതുകൊണ്ടാണ് രക്ഷപ്പെടാന് കഴിയാതിരുന്നതെന്ന് പൊലീസ് പറയുന്നു.
ആന്ധ്രാപ്രദേശ് കുര്ണൂല് ജില്ലയിലെ നന്ദ്യാല് നഗരത്തിന് സമീപമാണ് സംഭവം. എസ്ബിഐയിലെ ക്ലര്ക്കായ ശിവ കുമാറാണ് മരിച്ചത്. സുഹൃത്തുക്കള്ക്ക് ഒപ്പം ഹൈദരാബാദില് നിന്ന് നന്ദ്യാലിലേക്ക് വാഹനം ഓടിച്ച് മടങ്ങി വരുന്നതിനിടെയാണ് അപകടം ഉണ്ടായത്.
നിയന്ത്രണം വിട്ട കാര് ആ സമയത്ത് കടന്നുവന്ന കണ്ടെയ്നര് ട്രക്കിന്റെ അടിയിലേക്ക് ഇടിച്ചു കയറുകയായിരുന്നു. മുന്വശം പൂര്ണമായി തകര്ന്ന് കാര് കണ്ടെയ്നര് ട്രക്കിന്റെ അടിയില് കുടുങ്ങി. ഇതറിയാതെ ഡ്രൈവര് മൂന്ന് കിലോമീറ്ററാണ് കാറുമായി കണ്ടെയ്നര് ലോറി ഓടിച്ചത്. കാര് പൊട്ടിത്തെറിച്ച ശേഷം മാത്രമാണ് ലോറി നിര്ത്തിയത്.
അതിനിടെ മൂന്ന് സുഹൃത്തുക്കള് കാറില് നിന്ന് പുറത്തേയ്ക്ക് ചാടി രക്ഷപ്പെട്ടു. എന്നാല് ശാരീരിക വൈകല്യം കാരണം ബാങ്ക് ക്ലര്ക്കിന് രക്ഷപ്പെടാന് സാധിച്ചില്ല. ശിവ കുമാറിനൊപ്പം കാര് പൊട്ടിത്തെറിക്കുകയായിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ